پاکستان کے صوبہ بلوچستان میں بھارتی سرپرستی میں ہونے والی دہشتگردی کے شواہد منظر عام پرآگئے ہیں، جس میں معلوم ہوا ہے کہ بھارت پاکستان میں دہشتگرد گروپوں اور کالعدم تنظیموں کو مالی معاونت فراہم کرتا ہے۔
سیکیورٹی ذرائع کےمطابق بلوچستان میں بھارتی سر پرستی میں دہشتگردی کا ثبوت بھارتی میڈیا، نریندر مودی اور وزیردفاع کے بیانات سے بھی ثابت ہوتے ہیں، دہشتگرد گروپوں کے سرغنہ لاجسٹک اور آپریشنل بریفنگز کے لیے بھارت کا باقاعدگی سے دورہ کرتے ہیں۔
سیکیورٹی ذرائع کے مطابق صرف یہی نہیں بھارت میں ان دہشتگردوں کو طبی علاج کی سہولیات بھی مہیا کی جاتی ہیں، 2016 میں کالعدم تنظیم بی ایل اے کے سرغنہ ا سلم اچھو بھارت گیا، اسلم اچھو نے بھارت پہنچنے پر نہ صرف بھارتی خفیہ ایجنسی ’را‘ کے اہلکاروں سے ملاقات کی بلکہ دہلی کے اسپتال میں زیر علاج بھی رہا۔
ذرائع کا کہنا ہے کہ کالعدم بلوچستان لبریشن آرمی (بی ایل اے )کے سرغنہ نے عبدالحمید جعلی نام رکھ کر افغان پاسپورٹ کا استعمال کیا، 2018 میں کراچی میں چینی قونصلیٹ پر حملے کا ماسٹر مائنڈ کالعدم بی ایل اے اور مجید بریگیڈ کا سر غنہ اسلم اچھوتھا ہی تھا۔
بھارتی ایجنسی ’را‘ نے چین کے انجینیئرز پر حملوں کے لیے راجھستان میں دہشتگردوں کو تربیت دی
سیکیورٹی ذرائع کے مطابق دہشتگرد اسلم اچھو کا بیٹا ریحان 2018 میں دالبندین میں چینی انجینیئروں پر خودکش حملے میں ملوث تھا، کالعدم بی ایل اے کے موجودہ سرغنہ بشیر زیب نے 2017 میں بھارت کا دورہ کیا، دہشتگرد بشیر زیب افغان پاسپورٹ اور جعلی نام گل آغا کے ذریعے بھارت کا سفر کرتا تھا۔
ذرائع نے بتایا ہے کہ بشیر زیب نے بلوچستان میں ہونے والے حالیہ دہشتگردی کے حملوں کی منصوبہ بندی کی، دہشتگرد بشیر زیب کراچی ایئرپورٹ پر چینی اہلکاروں پر حملے اور جعفر ایکسپریس پر حملے کی منصوبہ بندی میں ملوث تھا، بلوچ نیشنل آرمی کے سرغنہ گلزار امام عرف شمبے نے بھی بھارتی ریاستی دہشتگردی کے واضح ثبوت دیے۔
سیکیورٹی ذرائع نے مزید بتایا ہے کہ دہشتگرد گلزار امام شمبے نے بھی بھارت میں زیر اعلاج رہنے کا اعتراف کیا تھا، ڈی جی آئی ایس پی آر نے بھی پاکستان میں بھارت کی ریاستی دہشتگردی کے ثبوت پیش کیے تھے۔ ڈی جی آئی ایس پی آر نے بھارتی فوج کے حاضر سروس افسران کی پاکستان میں دہشتگردانہ کارروائیوں کی نشاندہی کی تھی۔
بھارتی خفیہ ایجنسی ’را‘ کے 21 دہشتگرد تربیتی کمیپس کی تفصیل منظر عام پر آگئی
ذرائع کے مطابق بھارت پاکستان میں شہریوں اور فوج پر حملوں کے لیے دہشتگردوں کو بارود بھی فراہم کر تا ہے، بھارتی خفیہ ایجنسی ’را‘، اس وقت بھارت میں 21 سے زیادہ دہشتگردوں کے بیس کیمپس چلا رہی ہے، بھارت پاکستان میں دہشتگردانہ کارروائیوں کے لیے دہشتگردوں کی تربیت، ان کیمپوں میں کرتا ہے۔
ان دہشتگردوں کے کیمپس کا مرکز بھارتی ریاست راجستھان میں موجود ہے، سی پیک منصوبے اور پاک چین تعلقات کو سبوتاژ کرنے کیلئے بھارتی خفیہ ایجنسی ’را‘نے خصوصی سیل قائم کر رکھا ہے، بلوچستان میں نام نہاد دہشتگرد، بھارتی خفیہ ایجنسی ’را‘ کی مدد سے پاکستان میں معصوم لوگوں کا خون بہا رہے ہیں۔
By 
