پاکستان سے جنگ بندی دوطرفہ فیصلہ تھا ، ٹرمپ کا کوئی کردار نہیں ، بھارت

بھارتی سیکرٹری خارجہ وکرم مصری نے جنگ بندی میں امریکی کوششوں کا انکار کردیا۔

بھارتی سیکرٹری خارجہ وکرم مصری نے کہا کہ پاکستان اور بھارت کے درمیان جنگ بندی قطعی طور پر دوطرفہ فیصلہ تھا، ٹرمپ کا اس میں کوئی کردارنہیں تھا۔

بھارتی سیکرٹری نے صدر ٹرمپ کو بھی جھٹلا دیا، امریکی صدر ٹرمپ دنیا کے مختلف مقامات پر جاکر 7 بار کہہ چکے جنگ بندی انہوں نے کرائی، بھارتی سیکرٹری خارجہ نے پارلیمانی کمیٹی کو بریفنگ میں کہا کہ صدرٹرمپ نے ہم سے بیچ میں آنے کی اجازت نہیں لی، وہ خود ہی سٹیج پر آناچاہتے تھے اور وہ آگئے۔

سیکریٹری خارجہ وکرم مصری نے کہا ہے کہ پاکستان کے ساتھ تنازع ہمیشہ سے روایتی ہتھیاروں تک محدود ہے اور کبھی دونوں پڑوسی ملکوں نے ’ایٹمی ہتھیاروں کے استعمال کا کوئی اشارہ‘ نہیں دیا۔

بھارتی میڈیا کے مطابق پارلیمانی کمیٹی کی طرف سے بار بار پوچھا گیا کہ پاکستان سے جنگ میں کتنے بھارتی طیارے تباہ ہوئے لیکن وکرم مصری قومی سلامتی کا بہانہ بنا کر جواب دینےسے انکار کرتے رہے۔

واضح رہے کہ پاکستان اور انڈیا کے درمیان چھ سے 10 مئی تک سرحدی کشیدگی اور میزائل حملوں کے بعد امریکہ کے صدر ڈونلڈ ٹرمپ نے اعلان کیا تھا کہ انہوں نے دونوں ملکوں میں جنگ بندی کا معاہدہ کرایا۔