پاک چین تعلقات خطے میں امن و استحکام کی بنیاد ہیں ، ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چودھری نے کہا ہے پاک چین تعلقات خطے میں امن و استحکام کی بنیاد ہیں۔

ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے چینی میڈیا گروپ کو دیے گئے خصوصی انٹرویو میں بھارت کے ساتھ حالیہ کشیدگی، معرکۂ حق، پاک چین تعلقات اور خطے کی مجموعی صورتحال پر پاکستان کا دوٹوک مؤقف پیش کیا۔

انہوں نے کہا کہ پاکستان کی سب سے بڑی طاقت اس کی اپنی قوم اور اس کا عزم ہے،  ہم اللہ کے بعد سب سے زیادہ اپنے اوپر انحصار کرتے ہیں۔ جب عزم مضبوط ہو تو بین الاقوامی برادری بھی اپنا کردار ادا کرتی ہے۔

ان کا کہنا تھا کہ دنیا اس وقت کئی بڑے چیلنجز سے نبرد آزما ہے، جن میں موسمیاتی تبدیلی، آبادی میں اضافہ، اور معاشی مسائل شامل ہیں۔ ایسے میں اگر کوئی ملک دوسرے ملک پر بلاجواز اور جھوٹے بیانیے کے تحت چڑھ دوڑے، تو یہ عمل ناقابلِ قبول ہے۔

لیفٹیننٹ جنرل احمد شریف نے کہا کہ کوئی بھی ملک اپنے پڑوسیوں پر اجارہ داری قائم کرنے کی کوشش نہیں کر سکتا۔

یہ بھی پڑھیں : پاکستان سے جنگ بندی دوطرفہ فیصلہ تھا ، ٹرمپ کا کوئی کردار نہیں ،  بھارت

انہوں نے دوٹوک انداز میں کہا کہ پاکستانی قوم نہ پہلے جھکی تھی اور نہ اب جھکے گی،  ہمارے لیے شہادت زندگی سے زیادہ قیمتی ہے، چاہے کسی نے نیلی، سفید یا خاکی وردی پہنی ہو، شہادت ہمارے لیے اعزاز ہے۔

ڈی جی آئی ایس پی آر نے پاک چین تعلقات کو خطے میں امن و استحکام کی بنیاد قرار دیتے کہا کہ پاکستان اور چین دو ذمہ دار ریاستیں ہیں جن کی پہلی ترجیح عوام کی فلاح و بہبود ہے، پاکستان اور چین خطے میں امن و استحکام کے لیے کوشاں ہیں اور دہشتگردی کے خلاف جنگ میں دونوں ممالک کا تعاون مثالی ہے۔دہشتگردی کا مقصد ہی ترقی کو روکنا ہے، لیکن ہم اسے شکست دے کر ترقی کی راہ پر گامزن ہیں۔

انہوں نے چینی ترقی کی تعریف کرتے ہوئے کہا کہ دنیا کو چین کی کم عرصے میں بڑی آبادی کے ساتھ حاصل کردہ ترقی سے سبق لینا چاہیے، پاکستانی عوام بھی امن، استحکام اور ترقی کے خواہاں ہیں۔ ہماری اولین ترجیح امن ہے۔

ڈی جی آئی ایس پی آر نے کہا کہ آج پاکستان کی گلیوں میں لوگ فتح نہیں بلکہ امن کی خوشی مناتے نظر آتے ہیں، ہم عاجزی کرتے ہوئے اللہ کا شکر ادا کرتے ہیں، ہم اللہ تعالیٰ کے حضور سجدہ شکر ادا کرتے ہیں کیونکہ ہم امن پسند ہیں، آپ دیکھیں گے کہ انشاء اللہ پاکستان تیزی سے ترقی کرے گا۔