چینی کی قیمت میں کمی نہ ہو سکی، مہنگے داموں فروخت جاری

چینی کی قیمت میں کمی نہ ہو سکی، مہنگے داموں فروخت جاری ہے، ملک کے مختلف مقامات پر اوپن مارکیٹوں میں چینی 180سے 185روپے فی کلو میں فروخت ہو رہی ہے۔

نائب وزیراعظم اسحاق ڈار کی جانب سے چینی کی فی کلو ریٹیل قیمت 164روپے کرنے کی سخت ہدایات کے باوجود چینی کی قیمت میں کمی نہیں آ سکی ہے۔

رپورٹ کے مطابق رواں سال کے آغاز میں ملک بھر  میں چینی کی قیمت 140روپے تھی جبکہ منڈیوں میں چینی کے 50کلو والے تھیلے کی قیمت 6ہزار 200روپے تھی۔

ہزاروں روپے کے اضافے کے بعد سونے کی قیمت میں کمی ہو گئی

اب پرچون میں فی کلو قیمت 180سے 185روپے ہو گئی ہے جبکہ  50کلو والے تھیلے کی قیمت 1800روپے بڑھ کر 8ہزار 600روپے ہو گئی ہے۔

کراچی میں چینی کی ریٹیل قیمت 180 سے 185 روپے تک پہنچ گئی۔ نجی ٹی وی کے مطابق کراچی میں ہول سیل میں چینی کا بھاؤ 168 روپے فی کلو ہے، ہول سیل میں چینی کی سرکاری قیمت 160روپے ہے جبکہ ریٹیل میں 163 روپے فی کلو ہے۔

ہول سیلرز کے مطابق بازار کو چینی 167 روپے میں سپلائی کر رہے ہیں، ڈیلرز چینی بغیر بل کے فروخت کرتے ہیں۔