غلط فہمی پر معذرت، ایمل ولی نے چیئرمین پی ٹی اے کی معافی قبول کرلی

عوامی نیشنل پارٹی (اے این پی) کے صدر ایمل ولی نے منشیات سے متعلق متنازع ریمارکس پر چیئرمین پی ٹی اے میجر جنرل (ر) حفیظ الرحمان باچا خان کی معافی قبول کرلی۔

چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل (ر) حفیظ الرحمان نے آج پشاور میں باچا خان مرکز کا دورہ کیا جہاں اُن کا استقبال عوامی نیشنل پارٹی کے مرکزی صدر اور سینیٹر ایمل ولی خان نے کیا اس موقع پر ایک باہمی جرگہ بھی منعقد ہوا جس میں پشتون روایات کے مطابق معاملات کو افہام و تفہیم سے سلجھایا گیا۔

میجر جنرل (ر) حفیظ الرحمان نے اپنے دورے کے دوران ایک حالیہ واقعے کے حوالے سے وضاحت کرتے ہوئے کہا کہ جو واقعہ پیش آیا، وہ محض ایک غلط فہمی کی بنیاد پر تھا، اُس روز بھی معذرت کی تھی اور آج بھی گلے شکوے دور کرنے کے لیے باچا خان مرکز آیا ہوں،انہوں نے مزید کہا سینیٹر ایمل ولی خان اور اُن کے خاندان کو میں ہمیشہ عزت و احترام کی نگاہ سے دیکھتا ہوں۔

اس موقع پر سینیٹر ایمل ولی خان نے کہا باچا خان مرکز تمام مظلوموں اور پشتونوں کا گھر ہے، یہاں ہمیشہ سے جرگے ہوتے آئے ہیں، ہم پشتون روایات کا پاس رکھتے ہوئے چیئرمین پی ٹی اے کے جرگے کو قبول کرتے ہیں،انہوں نے چیئرمین پی ٹی اے اور ان کے ہمراہ آئے وفد کو خوش آمدید کہا اور کہا کہ ہم باچا خان مرکز پشاور میں ان کی آمد کو خوش آئند سمجھتے ہیں۔