’’اپنا میٹر اپنی ریڈنگ‘‘ اووربلنگ کا مسئلہ حل کرنے کے لیے حکومت کی نئی سکیم

حکومت نے بجلی کی اوور بلنگ کا مسئلہ حل کرنے کے لیے ’’اپنا میٹر اپنی ریڈنگ‘‘ اسکیم شروع کرنے کا اعلان کیا ہے۔

 قومی اسمبلی کی قائمہ کمیٹی برائے توانائی (پاور)  کا اجلاس ہوا، جس میں  وفاقی وزیر اویس لغاری نے کہا کہ بجلی صارفین کو ریلیف ماہانہ بنیاد پر دیا جائے،  متعلقہ ایس ڈی او کی ڈیوٹی لگائیں اور ریلیف ماہانہ بنیادوں پر فراہم کریں، سبسڈی کے اصل حق داروں کو ریلیف دے رہے ہیں۔

اویس لغاری نے بتایا کہ 100 یونٹ تک استعمال کرنے والوں کے لیے 56 فیصد بجلی سستی کی ہے اور 101 سے 200 تک استعمال کرنے والے صارفین کے لیے 48 فیصد  بجلی سستی کی گئی۔

انہوں نے بتایا کہ اوور بلنگ کا مسئلہ حل کرنے کے لیے وزیر اعظم جلد اسکیم کا اعلان کریں گے،  صارفین کو اپنی بلنگ کا اختیار دے رہے ہیں اور اس سلسلے میں ’’اپنا میٹر اپنی ریڈنگ‘‘ کے نام سے اسکیم کا اعلان کرنے جا رہے ہیں ،  صارفین اپنے موبائل سے میٹر کی ریڈنگ کر کے ایپ پر بھیج سکیں گے۔

یہ بھی پڑھیں : بھارتی ریاستی دہشتگردی کے مزید شواہد منظر عام پر آگئے

وفاقی وزیر توانائی کا کہنا تھا کہ سبسڈی کو بے نظیر انکم سپورٹ پروگرام کے صارفین سے جوڑ رہے ہیں ،  حکومت کا بجلی کے سلیبز کو تبدیل کرنے کا کوئی ارادہ نہیں۔

ان کامزید کہنا تھا کہ  بے نظیر انکم سپورٹ پروگرام کا بھی ڈیٹا درست کرنے کی ضرورت ہے،  آئی پی پی کے معاہدے ختم کرکے عوام کو 3400 ارب روپے کا فائدہ دیا، بجلی سستی کرنے کا سفر شروع کر چکے ہیں۔

اس سے قبل اجلاس شروع ہوا تو رکن رانا محمد حیات نے سوال اٹھایا کہ کیا آئندہ مالی سال میں بجلی ٹیرف میں مزید کمی ہو گی؟، جس پر چیئرمین نیپرا نے جواب دیا کہ فی الحال بجلی کا ریٹ اتنا ہی رہنے کا امکان ہے۔

یہ بھی پڑھیں : وزیراعلیٰ پنجاب مریم نواز کے بیٹے جنید صفدر کی دوسری شادی ، دلہن کون ہیں ؟

دوران اجلاس رانا محمد حیات نے بتایا کہ  صنعتی شعبے کو 30 فیصد ریلیف دیا گیا ہے جبکہ زرعی شعبے کو کوئی ریلیف نہیں دیا گیا ، جس پر سیکرٹری پاور ڈویژن نے بتایا کہ صنعتی شعبے کو ریلیف کراس سبسڈی ختم کرنے کے باعث حاصل ہوا اور بجلی شعبے کے لیے جامع منصوبہ بندی کی جا رہی ہے۔

اجلاس میں جنید اکبر نے کہا کہ  میں نے 4 ماہ قبل آفر کی تھی کہ میں کنڈا اتروانے کے لیے خود جاؤں گا،  ہم تعاون کرتے ہیں مگر ان سے لائن لاسز کم نہیں ہو رہے جبکہ صارف کو آٹھ آٹھ گھنٹے بجلی نہیں ملتی،  کام یہ نہیں کرتے اور گالیاں ہم کھاتے ہیں۔

سی ای او پیسکو نے کمیٹی میں کہا کہ ان کے علاقے میں ان کے تعاون سے بہت بہتری آئی ہے ، آئندہ ماہ سے مزید بہتری ہوگی۔