18 فیصد سیلز ٹیکس کے نفاذ سے قبل ہی سولر پینلز کی قیمتوں میں اضافہ  

حکومت کی جانب سے سولر پینلز کی درآمد پر 18 فیصد سیلز ٹیکس کے نفاذ اور بجٹ کی منظوری سے قبل ہی دکانداروں نے سولر پینلز کی قیمتوں میں اضافہ کردیا۔

میڈیا رپورٹ کے مطابق حکومت کی جانب سے سولر پینل کی درآمد پر 18 فیصد سیلز ٹیکس عائد کرنے کا فیصلہ یکم جولائی سے نافذ ہوگا اور اس کے لیے بجٹ کی باقاعدہ منظوری سال کے اختتام سے قبل ضروری ہے۔

صدر کے ریگل چوک میں موجود تاجروں نے سولر پینلز کی قیمت میں اضافے کا الزام درآمد کنندگان پر عائد کیا ہے، ان کا کہنا تھا کہ بجٹ اقدامات کے بعد قیمتوں میں اچانک اضافے سے کئی صارفین پریشان ، جبکہ کچھ  نے قیمتوں میں غیر یقینی صورت حال کے باعث خریداری کرلی۔

یہ بھی پڑھیں : سولر پینلز پر 18 فیصد سیلز ٹیکس عائد، مقامی مارکیٹ پر کیا اثرات مرتب ہونگے

انہوں نے بتایا کہ کئی خاندان جو سولر پینلز خریدنے آئے تھے، اچانک قیمتوں میں اضافے کی اطلاع ملنے پر واپس لوٹ گئے۔

ریگل چوک کے ایک تاجر نے بتایا کہ 5 کلو واٹ کے سولر سیٹ کی قیمت (جس میں انورٹر، واٹر بیسڈ بیٹری، آئرن فریم، الیکٹرک وائرنگ اور انسٹالیشن چارجز شامل ہیں) اب 6 سے 7 لاکھ روپے کے درمیان ہے، جب کہ 3 کلو واٹ کا سیٹ 4 سے 5 لاکھ روپے اور 6 کلو واٹ کا نظام 7 سے 8 لاکھ روپے میں فروخت ہو رہا ہے۔

ایک تاجر نے کہا کہ ’ہمیں مجبوراً قیمتیں بڑھانی پڑ رہی ہیں کیونکہ درآمد کنندگان نے 18 فیصد جی ایس ٹی کے باعث لاگت بڑھا دی ہے، یہ قیمتیں ہماری جانب سے نہیں بڑھائی گئیں‘۔

ریگل چوک کے ایک اور تاجر نے بتایا کہ لیتھیئم بیٹری کے ساتھ 5 کلو واٹ کا سسٹم اب 8 سے 8.5 لاکھ روپے میں دستیاب ہے، جب کہ بجٹ آنے سے پہلے یہی سسٹم 7 سے 7.5 لاکھ روپے میں مل رہا تھا۔

اسی طرح لیتھیئم بیٹری کے ساتھ 3 کلو واٹ کا سسٹم 7.5 لاکھ روپے میں ملتا ہے جب کہ واٹر بیٹری کے ساتھ یہی سسٹم 3.5 سے 4 لاکھ روپے میں دستیاب ہے۔

انہوں نے کہا کہ ’قیمتیں برانڈڈ بیٹری، انورٹر اور سولر پینلز پر منحصر ہوتی ہیں، جو 2 سے 3 سال کی وارنٹی کے ساتھ آتے ہیں، بہت سے دکاندار کم معیار کی اشیا بغیر کسی وارنٹی کے بھی فروخت کر رہے ہیں‘۔

یہ بھی پڑھیں: سولر کا بڑھتا رجحان، حکومت کا نیٹ میٹرنگ پالیسی تبدیل کرنے کا فیصلہ

تاجروں کا کہنا تھا کہ مارکیٹ میں چینی برانڈز کی بھرمار ہے، کیونکہ مقامی طور پر تیار کردہ سولر پینلز دستیاب نہیں، انہوں نے خدشہ ظاہر کیا کہ بلند قیمتیں سولر پینلز کی طلب کو متاثر کر سکتی ہیں۔

مقامی مینوفیکچرنگ کی حوصلہ افزائی

دوسری جانب انوریکس سولر انرجی کے سی ای او محمد ذاکر علی نے درآمدی سولر پینلز پر 18 فیصد سیلز ٹیکس کے حکومتی فیصلے کو خوش آئند قرار دیتے ہوئے کہا کہ یہ مقامی مینوفیکچرنگ کو فروغ دینے کی سمت ایک مثبت قدم ہے۔

تاہم انہوں نے خبردار کیا کہ صرف ٹیکس عائد کرنے سے مطلوبہ نتائج حاصل نہیں ہوں گے، جب تک کہ وسیع تر پالیسی اصلاحات نہ کی جائیں۔

واضح رہے کہ  وفاقی حکومت نے منگل، 10 جون 2025 کو مالی سال 2025-26 کے بجٹ پیش کرتے ہوئے درآمدی سولر پینلز پر 18 فیصد سیلز ٹیکس عائد کرنے کا اعلان کیا ہے۔

اس اقدام کا مقصد پاکستان میں مقامی سولر پینل بنانے والی کمپنیوں کو سہارا دینا اور ان کے لیے مارکیٹ میں مسابقت کے مساوی مواقع فراہم کرنا ہے۔

 اس وقت درآمدی سولر پینلز نسبتاً سستے ہونے کے باعث مقامی مینوفیکچررز کو شدید مشکلات کا سامنا ہے،  کم قیمت غیر ملکی پینلز کی وجہ سے پاکستان کی چھوٹی فیکٹریاں متاثر ہو چکی ہیں اور انہیں کاروبار میں نقصان اٹھانا پڑا ہے۔