By فیلڈ مارشل چیف آف آرمی اسٹاف جنرل سید عاصم منیر اپنے سرکاری دورۂ امریکہ کے دوران امریکی صدر ڈونلڈ ٹرمپ سے ملاقات کے لیے وائٹ ہاؤس پہنچ گئے ہیں۔ فیلڈ مارشل منیر کی صدر ٹرمپ سے ملاقات بدھ کے روز طے ہے۔
وائٹ ہاؤس کی جاری کردہ روزانہ کی عوامی شیڈول کے مطابق، فیلڈ مارشل عاصم منیر اور صدر ڈونلڈ ٹرمپ کے درمیان ظہرانے کی یہ ملاقات آج رات 10 بجے (پاکستان اسٹینڈرڈ ٹائم) وائٹ ہاؤس کے کابینہ روم میں منعقد ہوگی۔
فیلڈ مارشل اور چیف آف آرمی اسٹاف جنرل سید عاصم منیر ان دنوں سرکاری دورے پر امریکہ میں موجود ہیں، جہاں انہوں نے واشنگٹن ڈی سی میں مقیم پاکستانی تارکین وطن سے ایک انٹرایکٹو سیشن میں شرکت کی۔
اس موقع پر فیلڈ مارشل منیر نے قومی ترقی میں اوورسیز پاکستانیوں کے کردار کو سراہتے ہوئے کہا کہ وہ نہ صرف پاکستان کے شہری ہیں بلکہ ملک کے سفیر بھی ہیں۔ پاکستانی کمیونٹی کی ایک بڑی تعداد نے ان کا پرجوش استقبال کیا اور پاکستان کی مسلح افواج سے اظہار یکجہتی کرتے ہوئے وطن سے محبت کے نعرے لگائے۔
تقریب کے دوران تارکین وطن نے پاک فوج کو خراجِ تحسین پیش کیا، بالخصوص آپریشن “بنیان مرصوص (معرکۂ حق)” میں شاندار کارکردگی پر۔ شرکاء نے مسلح افواج کی پیشہ ورانہ مہارت، استقامت اور ملکی دفاع کے لیے غیرمتزلزل عزم کو سراہا۔
