بھارتی آبی جارحیت کے خلاف ایک مضبوط حکمت عملی کے لیے خصوصی کمیٹی تشکیل دینے کا فیصلہ کرلیا گیا۔
میڈیا رپورٹ کے مطابق وفاقی وزیر برائے ترقی و منصوبہ بندی احسن اقبال نے کہا ہے کہ پلاننگ کمیشن کی سربراہی میں انجینئرز پر مشتمل خصوصی کمیٹی تشکیل دی جائے گی۔
انجنیئرز کے وفد سے ملاقات میں احسن اقبال نے انجینئرز کے لیے لاہور میں قائم انجینئرز لاؤنج کا افتتاح کیا۔
اس موقع پر احسن اقبال نے کہا کہ کمیٹی میں انسٹیٹیوٹ آف انجینئرز پاکستان (آئی ای پی)، پاکستان انجینئرنگ کانگرس ، پاکستان انجینئرنگ کونسل (پی ای سی ) اور دی انسٹیٹیوٹ آف الیکٹریکل اینڈ الیکٹرانکس انجینئرز آف پاکستان (آئی ای ای ای پی) اور دیگر نمائندے شامل ہوں گے۔
وفاقی وزیر نے کہا کہ فیڈریشن آف انجینیرنگ انسٹیٹیوشن آف پاکستان بھی تشکیل دی جائے گی ، جب کہ تمام صوبوں کی مشاورت سے بھارتی آبی جارحیت سے نمٹنے کے لیے قومی پالیسی مرتب کریں گے۔
انہوں نے کہا کہ چاروں صوبوں کے انجینئرز پر مشتمل کمیٹی تکینیکی مسائل کو حل کرنے کے لیے تجاویز دے گی ، اور صوبوں کے درمیان ہونے والے تکنیکی مسائل کو سیاسی بنیادوں پر نہیں تکنیکی بنیادوں پر حل کیا جائے گا۔
سیکریٹری جنرل آئی ای پی انجنیئر امیر ضمیر خان نے اس موقع پر کہا کہ سیاست دانوں کو صوبائی جھگڑوں سے باہر نکلنا ہو گا، تمام انجنیئرز باڈیز پلاننگ کمیشن کی چھت تلے کردار ادا کرنے کے لیے تیار ہیں۔
انہوں نے کہا کہ آبی جارحیت کا مقابلہ کرنے کے لیے لاکھوں انجنیئرز حکومت کے ساتھ ہیں۔
اس سے قبل وزیر اعظم شہباز شریف نے بھارت کی آبی جارحیت سے نمٹنے کے لیے اسحاق ڈار کی سربراہی میں کمیٹی بنای تھی ، کمیٹی سے بھارتی آبی جارحیت کا مقابلہ کرنے کے لیے 72 گھنٹوں کے اندر اندر آبی منصوبوں کی سفارشات دینے کا کہا گیا۔
By 
