بھارت نے علی امین گنڈاپور کا بیان فیٹف میں پاکستان کے خلاف بطور ثبوت پیش کر دیا، فیٹف حکام کی تصدیق

ویب ڈیسک۔ بھارتی حکومت نے فنانشل ایکشن ٹاسک فورس (فیٹف) میں وزیراعلیٰ خیبر پختونخوا علی امین گنڈاپور کا بیان پاکستان کے خلاف بطور ثبوت جمع کروا دیا ہے۔

نجی ٹی وی جیو نیوز کے مطابق فیٹف حکام نے تصدیق کی ہے کہ بھارت کی جانب سے وزیراعلیٰ خیبر پختونخوا کا بیان پیش کیا گیا ہے، جس میں علی امین گنڈاپور نے الزام لگایا تھا کہ “ہم طالبان کو گرفتار کرتے ہیں لیکن ادارے انہیں رہا کر دیتے ہیں”۔

بھارتی حکومت نے فیٹف میں علی امین گنڈاپور کے اس بیان کو اپنے مؤقف کی تائید قرار دیتے ہوئے پاکستان کو دوبارہ گرے لسٹ میں شامل کرنے کی درخواست کی ہے۔

فیٹف حکام کا کہنا ہے کہ بھارت نے اس بیان کی بنیاد پر مؤقف اختیار کیا کہ پاکستان دہشت گردوں کی حمایت کرتا ہے۔ بھارتی حکومت نے علی امین گنڈاپور کے بیان کو پاکستان کے خلاف چارج شیٹ قرار دیا ہے۔

یہ بھی پڑھیں: نوے دن میں آر یا پار  ،بات فیصلہ سازوں سے ہوگی،گنڈاپور بات سیاسی قوتوں سے ہی ہوگی ،عظمیٰ بخاری

یاد رہے کہ اکتوبر 2022 میں فیٹف نے پاکستان کو گرے لسٹ سے نکال دیا تھا، جبکہ پاکستان 2018 سے گرے لسٹ میں شامل تھا۔

اس کے بعد سے بھارتی حکومت اور بھارتی میڈیا مسلسل پاکستان کے خلاف پروپیگنڈا کر رہے ہیں اور یہ کوشش جاری ہے کہ پاکستان کو دوبارہ گرے لسٹ میں شامل کرایا جائے۔