ہر شہری کو ڈیجیٹل ڈیوائسز تک آسان رسائی فراہم کرنے کے لیے وفاقی حکومت نے اسمارٹ فونز کو آسان اقساط میں فراہم کرنے کی نئی پالیسی تیار کرنے کا عندیہ دیا ہے۔
وفاقی وزیر شزا فاطمہ نے کہا ہے کہ ٹیکنالوجی علم تک رسائی کو عام کر سکتی ہے، اور نوجوان نسل بشمول خواتین طلبہ کو سائنس و ٹیکنالوجی کے شعبے میں نئے کیریئر مواقع تلاش کرنے کے قابل بنا سکتی ہے۔ انہوں نے مزید کہا کہ سائنس، ٹیکنالوجی، انجینئرنگ اور ریاضی (ایس ٹی ای ایم) پروگرام کا آغاز حکومت کے وسیع وژن کے مطابق ہے۔
انہوں نے بتایا کہ آسان اقساط میں اسمارٹ فونز کی فراہمی کے لیے نئی پالیسی ترتیب دی جا رہی ہے تاکہ ہر فرد ڈیجیٹل ڈیوائسز تک رسائی حاصل کر سکے۔
شزا فاطمہ نے بتایا کہ “ڈی جی اسکلز” پروگرام کے تحت گزشتہ ایک سال میں ایک لاکھ نوجوانوں کو تربیت دی گئی ہے، جبکہ رواں سال کے دوران 10 لاکھ بچوں کو مصنوعی ذہانت (AI) کی تربیت دینے کا ہدف مقرر کیا گیا ہے۔
تقریب سے خطاب کرتے ہوئے وزیر مملکت برائے وفاقی تعلیم و پیشہ ورانہ تربیت وجیہہ قمر نے کہا کہ ہم پاکستان میں “ایس ٹی ای ایم فیڈ” کے آغاز کا خیر مقدم کرتے ہیں، کیونکہ یہ نوجوان نسل کے لیے سائنس و ٹیکنالوجی کو زیادہ قابلِ رسائی اور دلچسپ بنانے کی طرف ایک اہم قدم ہے۔
By 
