لاہور: 9 مئی جلاؤ گھیراؤ کے مزید 2 مقدمات کا فیصلہ محفوظ

لاہور کی انسداد دہشت گردی عدالت نے تھانہ شادمان جلاؤ گھیراؤ اور جناح ہاؤس کے قریب راحت بیکری چوک پر پولیس کی گاڑیاں جلانے سے متعلق مقدمات کا فیصلہ محفوظ کر لیا ہے۔ دونوں مقدمات کا فیصلہ پیر 11 اگست کو سنایا جائے گا۔

انسداد دہشتگردی عدالت کے جج منظر علی گل نے ان مقدمات کی سماعت کوٹ لکھپت جیل میں رات گئے تک جاری رکھی۔ عدالت نے کہا کہ وقت کی کمی کے باعث فوری فیصلہ سنانا ممکن نہیں، اسی لیے دونوں کیسز کا فیصلہ محفوظ کیا گیا ہے۔

پہلے کیس میں، تھانہ شادمان جلاؤ گھیراؤ واقعے کے سلسلے میں 41 ملزمان کے خلاف چالان پیش کیا گیا، جن میں سے 25 کا باقاعدہ ٹرائل ہوا، 15 کو اشتہاری قرار دیا گیا جبکہ ایک ملزم دوران سماعت انتقال کر گیا۔ اس مقدمے میں 45 سرکاری گواہوں کے بیانات ریکارڈ کیے گئے۔

دوسرے کیس میں، جناح ہاؤس کے قریب راحت بیکری چوک پر پولیس گاڑیاں جلانے کے الزام میں 17 ملزمان پر فرد جرم عائد کی گئی، 7 کو اشتہاری قرار دیا گیا اور ایک ملزم دوران سماعت وفات پا گیا۔ اس مقدمے میں 65 گواہوں نے عدالت میں بیانات دیے۔

ان مقدمات میں نامزد ملزمان میں پی ٹی آئی کے سینئر رہنما شاہ محمود قریشی، ڈاکٹر یاسمین راشد، عمر سرفراز چیمہ، میاں محمود الرشید، سینیٹر اعجاز چوہدری، عالیہ حمزہ اور صنم جاوید شامل ہیں۔

یہ بھی پڑھیں: تحریک انصاف کو ایک اور بڑا جھٹکا، اہم رہنما کو عہدے سے ہٹا دیا گیا

یاد رہے کہ 9 مئی 2023 کو القادر ٹرسٹ کیس میں عمران خان کی اسلام آباد ہائی کورٹ سے گرفتاری کے بعد پی ٹی آئی کی جانب سے ملک بھر میں احتجاج کیا گیا تھا۔ اس دوران لاہور کے ماڈل ٹاؤن میں مسلم لیگ (ن) کے دفتر سمیت فوجی، سول اور نجی تنصیبات کو آگ لگائی گئی اور سرکاری و نجی املاک کو نقصان پہنچایا گیا۔ ان واقعات میں کم از کم 8 افراد ہلاک اور 290 زخمی ہوئے۔

مشتعل افراد نے لاہور میں کور کمانڈر کی رہائش گاہ، جسے جناح ہاؤس بھی کہا جاتا ہے، پر حملہ کیا اور راولپنڈی میں جنرل ہیڈکوارٹرز (جی ایچ کیو) کے ایک گیٹ کو توڑ دیا۔