ملک میں 14 اگست یومِ آزادی اور معرکہ حق کا جشن شایان شان طریقے سے منانے کی تیاریاں جوش و خروش سے جاری ہیں، ہر شہرکی سج دھج نرالی ہے، گلیاں بازار قومی پرچموں ، جھنڈیوں سے سج گئے ہیں۔
ملک بھر میں مختلف شہروں، قصبوں اور دیہاتوں میں جگہ جگہ قومی پرچم، بیجز، جھنڈیاں اور دیگر قومی اشیاء کے سٹالز لگ چکے ہیں جہاں شہری بڑی تعداد میں خریداری میں مصروف ہیں۔
سرکاری و نجی عمارتوں کو سبز و سفید روشنیوں سے سجایا جا رہا ہے، جبکہ گلی کوچوں میں رنگ برنگی جھنڈیاں اور قومی پرچم لہرا رہے ہیں۔
شہریوں نے گھروں، دکانوں اور دفاتر کو برقی قمقموں، خوبصورت لائٹس، اور جھنڈیوں سے سجا کر جشن آزادی کی تیاریوں کو نیا رنگ دے دیا ہے۔
لاہور میں سرکاری سطح پر بھی یوم آزادی کی تقاریب کے لیے تیاریاں شروع کر دی گئی ہیں، حضوری باغ ہو یا مینار پاکستان یا دوسرے عوامی تفریحی مقامات، ہر جگہ 14 اگست کے انتظامات کی جھلک نظر آنے لگی ہے۔
یوم آزادی کے سلسلہ میں شعراء اور ادبا بھی متحرک ہو چکے ہیں، مشاعروں کے انتظامات کا آغاز کر دیا گیا ہے، جامعات میں طلبہ بھی سرگرم ہو چکے ہیں، خاکے ، ڈرامے، کھیلوں کے مقابلے ہوں گے۔
یوم آزادی کے سلسلے میں مختلف سماجی، ثقافتی اور سرکاری تنظیموں نے خصوصی پروگرامز ترتیب دیئے ہیں۔
اس سال کی یوم آزادی کی تقریبات میں آپریشن بنیان مرصوص میں بھارت کے خلاف پاک فوج کی کامیابی نے ملی جوش و جذبہ بڑھا دیا ہے۔
اس حوالے سے شہریوں کا کہنا ہے کہ یومِ آزادی محض ایک دن نہیں بلکہ یہ قومی وحدت، قربانیوں کی یاد اور ملک سے محبت کا اظہار ہے، جسے ہر سال پورے جوش و خروش سے منانا ہمارا فخر ہے۔
By 
