بھارت پاکستانی سفارتکاروں کو ہراساں کرنے لگا، متعدد سفارتکاروں کو گھر خالی کرنے کا نوٹس

بھارت میں پاکستانی ہائی کمیشن کے سفارتکاروں کو ہراساں کیے جانے کے واقعات میں اضافہ ہوگیا ہے۔ میڈیا رپورٹس کے مطابق نئی دہلی میں تعینات 4 پاکستانی سفارتکاروں کو ان کے گھروں سے بے دخل کرنے کے نوٹس جاری کر دیے گئے ہیں۔ یہ سفارتکار نجی رہائش گاہوں میں کرائے پر مقیم ہیں۔

ذرائع کا کہنا ہے کہ چاروں سفارتکاروں کو مالک مکان کی جانب سے کرایہ داری معاہدے کی مدت ختم ہونے سے قبل ہی نوٹس دیا گیا۔ سفارتکاروں کی مسلسل نگرانی کی جا رہی ہے اور ان کے گھروں میں گیس اور انٹرنیٹ کی سہولیات وقتاً فوقتاً معطل کی جاتی ہیں۔

مزید بتایا گیا کہ سفارتکاروں سمیت 17 اسٹاف ارکان کے بھارتی ویزوں میں توسیع بھی بھارتی وزارت خارجہ میں زیر التوا ہے، حالانکہ ان ویزوں کی توسیع کے لیے 3 سے 5 ماہ قبل درخواست دی گئی تھی۔

یہ بھی پڑھیں: پاکستان طاقت کے استعمال سے متعلق اپنے مؤقف پر قائم ہے، دفتر خارجہ کا بھارتی وزارتِ خارجہ کے بیان پر سخت ردعمل

ذرائع کے مطابق نئی دہلی میں پاکستانی ہائی کمیشن کا پانی بھی بند کر دیا گیا ہے، جبکہ ڈیڑھ ماہ سے بھارتی اخبارات کی ترسیل بھی معطل ہے۔

ذرائع کا کہنا ہے کہ اس تمام صورتحال سے پاکستانی ہائی کمیشن نے وزارت خارجہ حکام کو آگاہ کر دیا ہے۔