اسلام آباد۔ وفاقی حکومت نے 25 جون کو جبری گمشدگیوں پر انکوائری کمیشن (CoIED) کی تشکیل نو کرتے ہوئے نئے چیئرمین اور خیبر پختونخوا، سندھ اور اسلام آباد کے اراکین کی تقرری کر دی۔
نوٹیفکیشن کے مطابق جسٹس ریٹائرڈ ارشد حسین شاہ کو چیئرمین تعینات کیا گیا، جبکہ جسٹس ریٹائرڈ سید افسر شاہ کو خیبر پختونخوا کا رکن بنایا گیا۔ جسٹس ریٹائرڈ نذر اکبر نے سندھ کے رکن کے طور پر جسٹس ریٹائرڈ ضیا پرویز کی جگہ لی اور ریٹائرڈ جج محمد بشیر نے اسلام آباد کے رکن کے طور پر سابق آئی جی محمد شریف وڑائچ کی جگہ سنبھالی۔
پریس انفارمیشن ڈیپارٹمنٹ کے مطابق، کمیشن نے تشکیل نو کے بعد ایک ماہ کے اندر جبری گمشدگیوں کے 70 کیسز نمٹا دیے، جبکہ 15 نئے کیسز رجسٹر کیے۔ 31 جولائی تک کمیشن مجموعی طور پر 10,607 میں سے 8,770 کیسز نمٹا چکا ہے۔
چیئرمین کمیشن جسٹس ریٹائرڈ ارشد حسین شاہ نے تمام صوبوں، اسلام آباد اور آزاد جموں و کشمیر کی مشترکہ تحقیقاتی ٹیموں اور صوبائی ٹاسک فورسز کو بروقت جامع رپورٹس جمع کرانے کی ہدایت کی ہے۔
By 
