مشہور ٹک ٹاکر مخدوم جنید جانی ہنی ٹریپ اسکینڈل میں گرفتار

لاہور: سوشل میڈیا پر شہرت حاصل کرنے والے معروف ٹک ٹاکر مخدوم جنید جانی کو ایف آئی اے نے ہنی ٹریپ کیس میں گرفتار کر لیا۔

الزامات کے مطابق جنید جانی نے ایک شخص کو جعلی اور نازیبا ویڈیوز کے ذریعے بلیک میل کیا اور اس سے بھاری رقم وصول کی۔ مبینہ طور پر متاثرہ شخص سے 40 لاکھ روپے بٹورے گئے جبکہ مزید 70 لاکھ روپے کا مطالبہ کیا گیا۔ جب متاثرہ شخص نے اضافی رقم دینے سے انکار کیا تو ٹک ٹاکر نے غیر اخلاقی ویڈیوز سوشل میڈیا پر لیک کر دیں۔

گرفتاری کے دوران جنید جانی نے ایف آئی اے ٹیم سے مزاحمت کی اور اپنے ساتھ موجود تین خواتین رشتہ داروں کو احتجاج پر اکسایا۔ اطلاعات کے مطابق واقعے کی لائیو اسٹریمنگ بھی کی گئی، جس سے عوام کی بڑی تعداد کی توجہ اس جانب مبذول ہوگئی۔

یہ بھی پڑھیں: ٹک ٹاک نے پاکستانی صارفین کی کروڑوں ویڈیوز ڈیلیٹ کردیں

حکام کے مطابق مزاحمت کے دوران ٹک ٹاکر نے ایک ایف آئی اے افسر کو تیز دھار آلے سے زخمی کیا، جس کے بعد فورس نے فوری کارروائی کرتے ہوئے جنید جانی اور تینوں خواتین کو حراست میں لے لیا۔

ایف آئی اے نے گرفتار افراد کے خلاف بلیک میلنگ، دھوکہ دہی اور سرکاری افسر کو نقصان پہنچانے کے الزامات کے تحت مقدمہ درج کر لیا ہے۔ حکام کا کہنا ہے کہ مزید تحقیقات کے بعد اس گروہ سے وابستہ دیگر افراد کو بھی گرفتار کیا جائے گا۔