’ایک دوست کیلئے دوسرے کو قربان نہیں کریں گے‘ فیلڈ مارشل سید عاصم منیر

برسلز: آرمی چیف فیلڈ مارشل سید عاصم منیر نے کہا ہے کہ پاکستان کو چین اور امریکا کے ساتھ تعلقات میں توازن رکھنے کا طویل تجربہ ہے اور ہم ایک دوست کے لیے دوسرے دوست کو قربان نہیں کریں گے۔

میڈیا سے گفتگو میں فیلڈ مارشل نے کہا کہ تبدیلی سے متعلق تمام افواہیں بے بنیاد ہیں، یہ افواہیں پھیلانے والے حکومت اور مقتدرہ دونوں کے مخالف ہیں۔ ان کا کہنا تھا کہ خدا نے مجھے ملک کا محافظ بنایا ہے اور اس کے علاوہ کسی عہدے کی خواہش نہیں، ایک ایک پاکستانی کے خون کا بدلہ لینا ہم پر لازم ہے۔

انہوں نے کہا کہ  امریکی صدر ڈونلڈ ٹرمپ کی امن کی خواہش حقیقی ہے، اسی لیے انہیں نوبیل انعام کے لیے نامزد کرنے میں پہل کی گئی، بعد ازاں باقی دنیا نے بھی اس معاملے میں پاکستان کی پیروی کی۔

فیلڈ مارشل سید عاصم منیر نے بھارت کو خبردار کیا کہ وہ پراکسیز کے ذریعے پاکستان کے امن کو نقصان نہ پہنچائے، جبکہ افغان حکومت کو چاہیے کہ طالبان کو پاکستان میں دھکیلنے کی کوشش بند کرے۔

یہ بھی پڑھیں: خیبر پختونخوا میں تعینات فوج سیلاب سے متاثر عوام کی بحالی میں بھرپور مدد کرے، فیلڈ مارشل سید عاصم منیر کی خصوصی ہدایات

برسلز میں اوورسیز پاکستانیوں نے فیلڈ مارشل کا جنگ کے فاتح کے طور پر پرتپاک استقبال کیا۔ وہ کئی گھنٹے کھڑے ہو کر دور دراز سے آئے پاکستانیوں سے ملتے رہے۔ انتظامیہ کی جانب سے ایک ساتھ اتنے لوگوں سے ملنے پر بدانتظامی کے خدشے کا اظہار کیا گیا، تاہم فیلڈ مارشل نے کہا کہ لوگ دور سے آئے ہیں، ان کا دل نہیں توڑا جاسکتا۔ جب تک آخری شخص ان سے ہاتھ ملا کر رخصت نہیں ہوا، وہ کھڑے رہے۔

مزید برآں، فیلڈ مارشل نے وزیراعظم شہباز شریف کی 18،18 گھنٹے محنت کو سراہا اور کہا کہ وزیراعظم اور کابینہ نے جنگ کے دوران جس عزم کا مظاہرہ کیا، وہ قابل تعریف ہے۔