کراچی میں موسلادھار بارش، کرنٹ لگنے سے 8 افراد جاں بحق

کراچی میں بارش کے بعد شہر کی اہم شاہراؤں پر ٹریفک کی روانی شدید متاثر ہوئی، جس کے باعث شہریوں کو مشکلات کا سامنا ہے۔

اس صورتحال میں پاک فوج اور سندھ رینجرز کے اہلکار شہریوں کی مدد کے لیے سڑکوں پر موجود ہیں۔ اہلکار ٹریفک کی روانی بحال کرنے میں مصروف ہیں اور خراب گاڑیوں کو کنارے پر کر دیا گیا ہے۔

مکینیکل ٹیم کے ہمراہ اہلکار خراب گاڑیوں کو درست کرنے میں بھی مصروف ہیں تاکہ شہریوں کو مزید پریشانی کا سامنا نہ کرنا پڑے۔

کراچی میں موسلادھار بارش، کرنٹ لگنے سے 8 افراد جاں بحق

کراچی میں موسلادھار بارش کے بعد مختلف حادثات اور کرنٹ لگنے کے واقعات میں مجموعی طور پر 8 افراد جاں بحق ہوگئے۔ شہر میں طوفانی بارش کے باعث اربن فلڈنگ کی صورتحال پیدا ہو گئی اور کئی علاقے ڈوب گئے۔

محکمہ موسمیات کے مطابق سب سے زیادہ بارش گلشن حدید میں 145 ملی میٹر ریکارڈ کی گئی، ایئرپورٹ اولڈ ایریا میں 138 ملی میٹر اور میٹ آفس یونیورسٹی روڈ پر 137 ملی میٹر بارش ہوئی۔

بارش کے دوران مختلف علاقوں میں کرنٹ لگنے سے 8 افراد جاں بحق ہوئے جبکہ کئی حادثات میں متعدد افراد زخمی بھی ہوئے۔

شدید بارش کے باعث شارع فیصل پر گاڑیاں پانی میں تیرنے لگیں جبکہ یونیورسٹی روڈ، اولڈ سٹی ایریا، صدر اور دیگر علاقوں میں پانی جمع ہوگیا۔ لیاقت آباد سے تین ہٹی جانے والی سڑک درمیان سے دھنس گئی۔ ناظم آباد، لیاقت آباد اور غریب آباد انڈر پاسز میں پانی بھر گیا۔ گرومندر پر بچوں سے بھری اسکول وین خراب ہوگئی جبکہ فیڈرل بی ایریا اور عزیز آباد میں گھروں میں پانی داخل ہوگیا۔

یہ بھی پڑھیں: شدید بارشیں اور سیلاب کا خدشہ، مری ، ایبٹ آباد اور کشمیر میں تعلیمی ادارے بند

میئر کراچی مرتضیٰ وہاب نے کہا کہ اگر 40 ملی میٹر سے زائد بارش ہو تو صورتحال خراب ہو جاتی ہے۔ ان کے مطابق صبح سے اب تک 100 ملی میٹر سے زائد بارش ہو چکی ہے، شہر میں 2 گھنٹے مسلسل بارش ہوئی جو ابھی بھی جاری ہے۔ انہوں نے کہا کہ تنقید کرنا عوام کا حق ہے لیکن حقائق کو بھی مدِنظر رکھنا چاہیے، ہم سب سڑکوں پر موجود ہیں اور صورتحال کو مانیٹر کر رہے ہیں۔ میئر نے شہریوں سے اپیل کی کہ غیر ضروری طور پر گھروں سے باہر نہ نکلیں، بارش کے سلسلہ ختم ہونے کے بعد ڈیڑھ گھنٹے میں صورتحال معمول پر آ جاتی ہے۔

سینئر وزیر شرجیل انعام میمن نے شہریوں سے اپیل کی ہے کہ شدید بارشوں کے دوران غیر ضروری طور پر گھروں سے نہ نکلیں۔