فیلڈ مارشل سید عاصم منیر کی کامیاب سفارت کاری نے پاکستان کو بلندیوں پر پہنچا دیا، واشنگٹن پوسٹ

پاکستان اور امریکا کے تعلقات ایک نئی مثبت جہت میں داخل ہو چکے ہیں، جسے بین الاقوامی ذرائع ابلاغ اور تجزیہ کارفیلڈ مارشل سید عاصم منیر کی اہم سفارتی حکمت قراردے رہے ہیں۔

معروف امریکی جریدے واشنگٹن پوسٹ نے اپنی حالیہ رپورٹ میں پاکستان کی خارجہ پالیسی، خصوصاً فیلڈ مارشل سید عاصم منیر کی قیادت میں ہونے والی سفارتی کوششوں کو قابلِ ستائش قرار دیا ہے۔

یہ بھی پڑھیں:بھارت کی خارجہ پالیسی ناکام، پاکستان کی سفارتی کامیابیاں کا سفر جاری

رپورٹ کے مطابق، فیلڈ مارشل عاصم منیر کا حالیہ دورہ امریکا، پاک امریکا تعلقات میں ’ایک نئی جہت کی علامت ‘ بن چکا ہے۔ بدلتے ہوئے عالمی منظرنامے اور سابق امریکی صدر ڈونلڈ ٹرمپ کے ممکنہ دوبارہ انتخاب کو پاکستان کے لیے ایک چیلنج تصور کیا جا رہا تھا، تاہم پاکستانی حکام نے دانشمندانہ حکمت عملی کے تحت وائٹ ہاؤس کے ساتھ قریبی روابط کو فروغ دیا۔

واشنگٹن پوسٹ نے انسداد دہشتگردی میں پاکستان کے اقدامات کو سراہا اور اس کے نتیجے میں امریکا نے کالعدم تنظیم ’بی ایل اے‘ کو عالمی دہشتگرد تنظیم قرار دے دیا، جو پاکستانی سفارت کاری کی ایک بڑی کامیابی سمجھی جا رہی ہے۔

واشنگٹن پوسٹ کے مطابق پاکستان نے امریکا کو کرپٹو کرنسی کے منصوبوں اور معدنی وسائل کی ترقی میں شراکت داری کی پیشکش کی ہے۔ رپورٹ کے مطابق صدر ٹرمپ نے پاکستان میں مختلف شعبوں میں سرمایہ کاری میں دلچسپی ظاہر کی ہے، جو دونوں ممالک کے درمیان معاشی تعلقات کے نئے دور کا آغاز ثابت ہو سکتا ہے۔

مزید پڑھیں:پاکستان کی سفارتی محاز پر کامیابی ، وال اسٹریٹ جرنل بھارتی لابی کی خفت مٹانے کیلئے پراپیگنڈے کا شکار

بھارت کے ساتھ جنگ بندی کے بعد پاک، امریکا تعلقات میں مزید بہتری آئی ہے، جو خطے میں امن و استحکام کے لیے نیک شگون تصور کیا جا رہا ہے۔ بین الاقوامی ماہرین کا ماننا ہے کہ پاکستان کی یہ سفارتی کامیابیاں نہ صرف خطے میں اس کے کردار کو مضبوط کر رہی ہیں بلکہ عالمی سطح پر اس کی مثبت شبیہ کو بھی اجاگر کر رہی ہیں۔