مصر کے دارالحکومت قاہرہ میں 13 سالہ لڑکے کی اچانک موت نے والدین اور سماجی حلقوں کو ہلا کر رکھ دیا۔ واقعہ اس وقت پیش آیا جب لڑکے نے بیک وقت نوڈلز کے تین پیکٹ کھائے اور کچھ دیر بعد اس کی طبیعت بگڑ گئی۔
گھر والوں کے مطابق، بچے کو شدید پیٹ درد، قے، پسینے اور تھکن کی شکایت ہوئی اور اسپتال لے جاتے ہوئے راستے میں ہی دم توڑ گیا۔ ابتدائی طور پر ڈاکٹرز نے زہر خورانی کا شبہ ظاہر کیا ہے، تاہم حتمی وجہ پوسٹ مارٹم رپورٹ کے بعد ہی سامنے آئے گی۔
پولیس نے واقعے کا مقدمہ درج کرتے ہوئے نوڈلز کے نمونے لیبارٹری بھجوا دیے ہیں جبکہ لاش کو فرانزک تجزیے کے لیے منتقل کر دیا گیا ہے۔ حکام کے مطابق فی الحال کھانے کی اشیاء کے معیار پر سوال اٹھانا قبل از وقت ہوگا۔
ماہرین صحت کا کہنا ہے کہ ایک ساتھ زیادہ نوڈلز کھانے سے مختلف پیچیدگیاں پیدا ہو سکتی ہیں، جن میں آنتوں کی رکاوٹ، الرجی یا نمک اور دیگر اجزاء کی زیادتی کے باعث جسم پر دباؤ شامل ہے۔ ان کے مطابق نوڈلز میں کاربوہائیڈریٹ اور سوڈیم کی زیادہ مقدار طویل عرصے میں موٹاپا، ہائی بلڈ پریشر اور گردوں کے مسائل پیدا کر سکتی ہے۔
واقعے کے بعد سوشل میڈیا پر بحث چھڑ گئی ہے۔ صارفین نے والدین سے بچوں کی خوراک پر نظر رکھنے کی اپیل کی ہے جبکہ کئی افراد نے حکومت سے پروسیسڈ فوڈ کی سخت نگرانی کا مطالبہ کیا ہے۔
By 
