محکمہ تعلیم پنجاب کا میٹرک کے ناقص نتائج دینے والے سکولز اور اساتذہ کی فہرستیں تیار کرنے کا حکم

محکمہ تعلیم پنجاب نے نویں اور دسویں جماعت کے ناقص نتائج دینے والے سکولوں اور اساتذہ کی فہرستیں تیار کرنے کا حکم دے دیا۔

صوبائی وزیر تعلیم رانا سکندر حیات نے جمعرات کو سماجی رابطے کی ویب سائٹ پر پیغام جاری کرتے ہوئے کہا کہ پہلی بار محکمہ سکول ایجوکیشن کی ٹیم نویں اور دسویں جماعت میں ناقص نتائج دینے والے سکولوں اور اساتذہ کی فہرستیں تیار کر رہی ہے۔

خراب نتائج دینے والے اساتذہ کو نوکریوں سے فارغ کر دیا جائے گا۔ وزیر مملکت نے کہا کہ اربوں روپے خرچ کرنے کے باوجود ناقص نتائج برداشت نہیں کیے جائیں گے۔

انہوں نے مزید کہا کہ میں اپنے ضلع اور تحصیل کے سکولوں کا احتساب کروں گا، اچھے نتائج دینے والے اساتذہ کی فہرست بھی تیار کی جا رہی ہے، اچھے نتائج پر اساتذہ کو انعامات سے بھی نوازا جائے گا۔