بھارت کی آبی دہشتگردی،دریائے ستلج میں پانی چھوڑ دیا، اونچے درجے کے سیلاب کا خدشہ

مودی سرکارنے ایک بار آبی دہشتگردی شروع کردی ،بھارت کی جانب سے پانی چھوڑے جانے کے بعد دریائے ستلج میں پانی کی سطح تیزی سے بڑھنے لگی ہے جس سے شدید سیلاب کا خدشہ پیدا ہوگیا ہے۔

پی ڈی ایم اے پنجاب کے ترجمان کے مطابق گنڈا سنگھ والا کے مقام پر پانی کا بہاؤ 95 ہزار کیوسک تک پہنچ چکا ہے اور ضلعی انتظامیہ و ریسکیو اداروں کو الرٹ رہنے کی ہدایت جاری کر دی گئی ہے۔

ڈی جی پی ڈی ایم اے عرفان علی کاٹھیا نے بتایا کہ قصور میں متاثرہ دیہات کے مکینوں کی مدد کے لیے 17 ریلیف کیمپس قائم کیے گئے ہیں جہاں ادویات، اینٹی سنیک ویکسین، پینے کا صاف پانی اور کھانے پینے کی اشیاء دستیاب ہیں۔

یہ خبر بھی پڑھیں :بلوچستان سے آنیوالا طاقتور اسپیل سندھ میں داخل، جیکب آباد میں سیلاب کا خدشہ

ان کا کہنا تھا کہ ممکنہ انخلاء کے لیے 298 گاڑیاں، 13 او بی ایم کشتیاں، 16 لائف رنگز، 210 لائف جیکٹس اور دیگر ریسکیو سامان بھی تیار رکھا گیا ہے۔

ڈی جی پی ڈی ایم اے نے مزید وضاحت کی کہ دریائے ستلج میں 80 ہزار کیوسک تک پانی آنے سے نچلے درجے کا، 1 لاکھ 20 ہزار کیوسک تک درمیانے درجے کا جبکہ 1 لاکھ 75 ہزار کیوسک سے زائد آنے پر اونچے درجے کا سیلاب آسکتا ہے۔

انتظامیہ کے مطابق دریائے ستلج میں بڑھتے ریلے کے باعث منچن آباد میں بھی ہائی الرٹ جاری کر دیا گیا ہے جبکہ ہیڈ سلیمانکی پر پانی کا بہاؤ ایک لاکھ کیوسک تک پہنچ رہا ہے اور کسی بھی ہنگامی صورتحال سے نمٹنے کے لیے تمام تیاریاں مکمل ہیں۔