چنگان کا متاثرہ گاڑیوں کے لیے رعایتی پیکج، مرمت پر 50 فیصد ڈسکاؤنٹ کا اعلان

حالیہ بارشوں سے گاڑیوں کو پہنچنے والے نقصان کے پیش نظر چنگان پاکستان نے صارفین کے لیے ایک عارضی ریلیف پیکج متعارف کروایا ہے، جس کے تحت متاثرہ گاڑیوں کی مرمت پر 50 فیصد رعایت فراہم کی جائے گی۔ یہ سہولت 31 اگست 2025 تک کمپنی کے مجاز سروس سینٹرز پر دستیاب ہوگی۔

رپورٹس کے مطابق یہ رعایت چنگان اور ڈیپل دونوں ماڈلز پر لاگو ہوگی، جس میں مزدوری کے اخراجات سمیت بارش کی شدت سے متاثرہ حصوں کی مرمت پر 30 ہزار روپے تک کا ریلیف شامل ہے۔ کمپنی کے مطابق اس مہم کا مقصد صارفین کو کم خرچ پر مرمت کی سہولیات فراہم کرنا ہے۔

پیکج میں بارش کے پانی سے ہونے والے تمام نقصانات شامل ہیں، جیسے برقی خرابیوں کا پیدا ہونا، پانی کے داخلے سے انجن کو پہنچنے والا نقصان، گاڑی کی باڈی پر ڈینٹ یا زنگ لگنا اور دیگر مکینیکل مسائل۔ تاہم، مرمت کے اخراجات اور رعایت کا حتمی فیصلہ سروس سینٹرز کے معائنے کے بعد کیا جائے گا۔

یہ بھی پڑھیں: کمشنر راولپنڈی کے آفس میں ایک اجلاس میں شریک مقامی افسران کی گاڑیاں: سوشل میڈیا پر دلچسپ تبصرے

کمپنی نے واضح کیا ہے کہ ڈسکاؤنٹ صرف ان گاڑیوں کے لیے ہوگا جو براہ راست بارش یا موسمی حالات کے باعث خراب ہوئی ہوں۔ مزید یہ کہ تمام مرمت کا کام چنگان کی منظور شدہ ورکشاپس پر کیا جائے گا تاکہ معیاری سروس فراہم کی جاسکے۔