سوزوکی آلٹو کو قیمتوں میں اضافہ ہوتے ہی بڑا دھچکا لگ گیا

سوزوکی کو اپنی سب سے زیادہ فروخت ہونے والی گاڑی ’آلٹو‘ کی سیلز میں گزشتہ ماہ نمایاں کمی کا سامنا کرنا پڑا۔

پاکستان آٹوموٹیو مینوفیکچررز ایسوسی ایشن (PAMA) کے مطابق، جون میں 9,497 یونٹس فروخت ہونے کے بعد جولائی میں آلٹو کی فروخت 75 فیصد کمی کے ساتھ صرف 2,327 یونٹس رہی۔ یہ تعداد گزشتہ سال جولائی میں فروخت ہونے والے 2,869 یونٹس سے بھی کم ہے۔

حکومت نے حال ہی میں 850 سی سی تک کی گاڑیوں پر جنرل سیلز ٹیکس (GST) 12.5 فیصد سے بڑھا کر 18 فیصد کر دیا ہے۔ اس کے ساتھ نئی این ای وی لیوی بھی نافذ کی گئی ہے، جس کے تحت 1300 سی سی تک گاڑیوں پر 1 فیصد، 1301 سے 1800 سی سی تک گاڑیوں پر 2 فیصد اور 1800 سی سی سے زائد گاڑیوں پر 3 فیصد لیوی عائد کی گئی۔ آلٹو 1300 سی سی کے زمرے میں شامل ہونے کے باعث جی ایس ٹی کے اضافے کے ساتھ 1 فیصد لیوی کا بھی سامنا کر رہی ہے۔

یہ بھی پڑھیں: سیکنڈ ہینڈ گاڑیاں خریدتے وقت کسی بھی ممکنہ فراڈ سے بچنے کا طریقہ

ٹیکسز میں اضافے کے بعد پاکستان سوزوکی موٹرز کمپنی (PSMC) نے آلٹو کی قیمت بڑھا کر 33,26,450 روپے کر دی، جس سے بجٹ کے مطابق گاڑی خریدنے والے صارفین کے لیے مشکلات مزید بڑھ گئیں۔