کیا آپ کے فون کی کال سیٹنگز بھی تبدیل ہو گئیں؟ اصل وجہ جانئے

حالیہ دنوں میں پاکستان سمیت بھارت کے اینڈرائیڈ صارفین نے اپنے اسمارٹ فون کی کال سیٹنگز میں اچانک اور خودکار طور پر ہونے والی تبدیلی کو محسوس کیا۔ اس تبدیلی کے بعد اینڈرائیڈ صارفین کے موبائل فونز میں کال کرنے یا کال موصول ہونے پر فون کا انٹرفیس بھی بدل گیا۔

سوشل میڈیا پر اس حوالے سے متعدد صارفین نے ردِ عمل دیا۔ کچھ نے اسے ہیکنگ قرار دیتے ہوئے شکوک و شبہات کا اظہار کیا، جبکہ بعض صارفین نے اسے اینڈرائیڈ اپ ڈیٹ سمجھ کر اطمینان کا اظہار کیا۔

نئی تبدیلی کے تحت اب جب صارفین اپنے اینڈرائیڈ فون کو کھولتے ہیں تو گوگل کی جانب سے دیا گیا ’ریسنٹ‘ یعنی حالیہ کالز یا ’فیورٹس‘ کا آپشن حذف ہو چکا ہے۔ گوگل نے ان آپشنز کو ختم کر کے ’ہوم‘ میں ضم کر دیا ہے۔ اس کے بعد صارفین کو صرف دو آپشنز یعنی ’ہوم‘ اور ’کی پیڈ‘ (ڈائلر) نظر آتے ہیں۔

اگر آپ بھی اس اچانک تبدیلی سے پریشان ہیں تو اس کی وجہ جان لیجیے۔ برطانوی نشریاتی ادارے بی بی سی کی رپورٹ کے مطابق، اینڈرائیڈ اسمارٹ فون کا سافٹ ویئر بنانے اور اپ ڈیٹ کرنے والی کمپنی گوگل نے مئی میں ہی اس تبدیلی کا اعلان کر دیا تھا۔

یہ بھی پڑھیں: کیا موبائل کمپنیوں نے صارفین سے اضافی پیسے وصولی کئے؟ پی ٹی اے نے وضاحت جاری کردی

گوگل کے اعلان کے مطابق، کمپنی ’مٹیریل تھری ایکسپریسیو‘ نامی سب سے بڑی اپ ڈیٹ پر کام کر رہی ہے۔ اس اپ ڈیٹ کا مقصد فون کے سافٹ ویئر اور ڈسپلے کو زیادہ سادہ، آسان، تیز اور معلوماتی بنانا ہے۔

اس تبدیلی کے بعد ڈسپلے سیٹنگز میں کئی فیچرز، مثلاً نوٹیفکیشنز، کلر تھیمز، فوٹوز، جی میل اور واچ وغیرہ میں بھی تبدیلی ہوگی۔ گوگل کا کہنا ہے کہ اس اپ ڈیٹ کا اصل مقصد کال ایپ کو زیادہ آسان اور صارف دوست بنانا ہے۔

واضح رہے کہ اس اپ ڈیٹ سے قبل اینڈرائیڈ فونز کا ڈسپلے ’مٹیریل یو‘ ڈیزائن پر چل رہا تھا۔