ایران نے پاکستانی سرحد سے متصل صوبہ سیستان بلوچستان میں ایک خفیہ کارروائی کے دوران چھ دہشت گرد ہلاک اور دو کو گرفتار کر لیا ہے، جنہیں اسرائیل سے منسلک صیہونی ایجنٹس قرار دیا گیا ہے۔
ایرانی سرکاری خبر رساں ایجنسی کے مطابق یہ دہشت گرد ایک ایسے گروہ سے تعلق رکھتے تھے جو مشرقی ایران میں اہم اسٹریٹیجک تنصیبات کو نشانہ بنانے کی منصوبہ بندی کر رہا تھا۔
یہ خبر بھی پڑھیں :ایران کی بڑی کارروائی، موساد کے 20 جاسوس گرفتار
عرب میڈیا کے مطابق یہ کارروائی ایرانی انٹیلیجنس ایجنسی کی جانب سے کی گئی، جس میں شدید فائرنگ کا تبادلہ ہوا اور دو انٹیلیجنس اہلکار و ایک پولیس افسر زخمی ہوئے۔
ایرانی حکام نے بتایا کہ ہلاک دہشت گرد غیر ملکی تھے اور ان کے قبضے سے صیہونی ایجنڈے سے متعلق دستاویزات برآمد ہوئی ہیں۔
گروہ ایران کے اندر تخریب کاری، دہشت گردی اور جاسوسی کے مشن پر تھا، جس کا ہدف مشرقی ایران کی ایک اہم اسٹریٹیجک تنصیب کو نقصان پہنچانا تھا۔
دہشت گرد گروہ کا مرکزی سیل سات غیر ایرانی شدت پسندوں پر مشتمل تھا، تاہم ان کی شہریت ظاہر نہیں کی گئی۔
سیستان بلوچستان ایران کی سنی بلوچ اقلیت کا گڑھ اور سب سے زیادہ حساس علاقہ مانا جاتا ہے، جہاں حالیہ دنوں میں شدت پسند تنظیمیں جیش العدل اور انصار الفرقان کئی کارروائیوں میں ملوث رہی ہیں۔
By 
