By چین کی وزارتِ خارجہ نے چند روز قبل فیلڈ مارشل سید عاصم منیر سے ہونے والی ملاقات کے حوالے سے اپنے بیان میں کہا ہے کہ وزیرِ خارجہ وانگ ای نے فیلڈ مارشل سید عاصم منیر سے اہم ملاقات کے دوران پاک چین تعلقات پر اطمینان کا اظہار کیا۔
بیان کے مطابق وانگ ای نے کہا کہ پاکستانی فوج قومی استحکام کا ستون ہے اور پاک چین دوستی و تعاون کی مضبوط محافظ ہے، انہوں نے کہا کہ پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد میں بھرپور کردار ادا کیا ہے۔
وانگ ای نے زور دیا کہ موجودہ غیر یقینی عالمی حالات میں مضبوط پاک چین تعلقات کو فروغ دینا علاقائی امن و استحکام کے لیے نہایت اہم ہے، ان کا کہنا تھا کہ چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے اور وقت کے کڑے امتحانات کے باوجود دونوں ممالک کے تعلقات مزید مضبوط ہوئے ہیں۔
یہ خبر بھی پڑھیں :فیلڈ مارشل سے چینی وزیر خارجہ کی ملاقات ،اسٹریٹجک شراکت داری مزید مضبوط بنانے کے عزم کا اعادہ
چینی وزیرِ خارجہ نے کہا کہ پاکستان اور چین ایک مضبوط روایتی دوستی قائم کر چکے ہیں اور چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا، وانگ ای نے مزید کہا کہ چین عالمی امور میں پاکستان کے بڑے کردار کا خیر مقدم کرتا ہے۔
وزارتِ خارجہ کے مطابق فیلڈ مارشل سید عاصم منیر نے ملاقات کے دوران کہا کہ چین پاکستان کا آہنی دوست ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں، انہوں نے کہا کہ پاک چین اسٹریٹجک شراکت داری چٹان کی طرح مضبوط ہے اور چین کے ساتھ دوستانہ تعلقات قائم رکھنا پورے پاکستانی قوم کا متفقہ موقف ہے۔
فیلڈ مارشل نے پاکستان کی معاشی اور سماجی ترقی میں قیمتی تعاون پر چین کی قیادت سے اظہارِ تشکر کیا۔ ان کا کہنا تھا کہ پاکستانی فوج انسدادِ دہشت گردی اور سکیورٹی تعاون کو مزید فعال بنانے کے لیے تیار ہے اور پاکستان میں چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی۔
انہوں نے اس عزم کا اعادہ کیا کہ پاک چین دوستی کو مزید مستحکم بنانے کے لیے دونوں ممالک ترقی کی راہ پر گامزن رہیں گے۔
