جعلی پیغامات اور آن لائن دھوکہ دہی کی بڑھتی ہوئی وارداتیں، زونگ کا صارفین کے نام اہم پیغام

زونگ کمپنی نے اپنے صارفین کے نام جاری ہدایت میں کہا ہے کہ صارفین جعلی پیغامات سے ہوشیار رہیں۔

کمپنی نے اپنے آگاہی پیغام میں کہا ہے کہ ای چالان، بینظیر انکم سپورٹ پروگرام ، بینک یا ایف آئی اے کے نام سے موصول ہونے والے مشکوک ایس ایم ایس میں موجود لنکس پر کلک نہ کریں۔

ٹیلی مواصلاتی کمپنی زونگ نے اپنے صارفین کو جعلی پیغامات اور آن لائن دھوکہ دہی کی بڑھتی ہوئی وارداتوں کے پیش نظر محتاط رہنے کی ہدایت جاری کی ہے۔

کمپنی کی جانب سے جاری کردہ آگاہی پیغام میں صارفین کو خبردار کیا گیا ہے کہ ای چالان، بینظیر انکم سپورٹ پروگرام، بینکوں یا وفاقی تحقیقاتی ادارے کے نام سے موصول ہونے والے مشکوک پیغامات پر ہرگز اعتماد نہ کریں، زونگ نے کہا ہے کہ ایسے پیغامات میں شامل روابط پر کلک کرنے سے صارفین کی ذاتی اور مالی معلومات خطرے میں پڑ سکتی ہیں۔

یہ بھی پڑھیں :بجٹ ، سوشل میڈیا انفلوئنسرز اور ٹک ٹاکرز کی آمدن سے متعلق بڑا فیصلہ

کمپنی نے صارفین پر زور دیا ہے کہ وہ کسی بھی نامعلوم یا مشتبہ پیغام میں مانگی جانے والی معلومات، جیسے شناختی کارڈ نمبر، بینک تفصیلات، خفیہ رموز یا دیگر ذاتی معلومات کسی کے ساتھ شیئر نہ کریں۔

زونگ کے مطابق اگر کسی صارف کو کسی سرکاری ادارے، بینک یا فلاحی پروگرام کے نام سے کوئی مشکوک پیغام موصول ہو تو اس پر عمل کرنے سے قبل متعلقہ ادارے سے براہ راست رابطہ کر کے معلومات کی تصدیق ضرور کی جائے۔

کمپنی کا کہنا ہے کہ سائبر دھوکہ دہی کے واقعات سے بچاؤ کے لیے عوامی آگاہی انتہائی ضروری ہے، اس لیے صارفین کو چاہیے کہ وہ صرف مستند ذرائع سے موصول ہونے والی معلومات پر اعتماد کریں اور کسی بھی غیر مصدقہ پیغام یا رابطے سے محتاط رہیں۔