بھارتی آبی جارحیت، دریائے راوی تباہی مچانے لگا، سیلابی ریلے نے لاہور کا رخ کرلیا، متعدد علاقے متاثر

سیلاب سے کئی مقامات پر بند ٹوٹ گئے، سیکڑوں بستیاں ڈوب گئیں اور کھڑی فصلیں تباہ ہوگئیں۔ مختلف حادثات میں 17 افراد جاں بحق اور متعدد لاپتہ ہیں۔

بھارت کی جانب سے دریاؤں میں پانی چھوڑنے کے بعد پنجاب کے مختلف اضلاع میں تباہی مچ گئی۔ متاثرہ علاقوں میں ریسکیو آپریشن جاری ہے اور اب تک 45 ہزار سے زائد افراد کو محفوظ مقامات پر منتقل کیا جاچکا ہے۔ سب سے زیادہ متاثرہ اضلاع میں گجرات، گجرانوالہ، منڈی بہاؤالدین، حافظ آباد، نارووال، شیخوپورہ، ننکانہ صاحب، قصور، اوکاڑہ اور پاکپتن شامل ہیں۔

راوی میں شاہدرہ کے مقام پر پانی کا بہاؤ 1 لاکھ 91 ہزار کیوسک ہے جو بڑھ کر 2 لاکھ کیوسک تک جاسکتا ہے۔ اطراف کی آبادیوں میں انخلا کے اعلانات کیے جارہے ہیں اور لاہور کے پانچ تحصیلوں کے 22 دیہات خالی کرائے جاچکے ہیں۔ کوٹ نینا، جسڑ اور سائفن سمیت کئی مقامات پر اونچے درجے کا سیلاب جاری ہے۔

دریائے چناب میں مرالہ کے مقام پر درمیانے درجے کا سیلاب ہے، تاہم خانکی اور قادرآباد پر انتہائی خطرناک صورتحال ہے جہاں پانی کا بہاؤ 8 لاکھ 59 ہزار سے 9 لاکھ 96 ہزار کیوسک تک ہے۔ سبمڑیال میں 50 سے زائد دیہات زیر آب آچکے ہیں اور ہلاکتوں کی تعداد 8 ہوچکی ہے۔ جمعہ کو یہ ریلا مظفرگڑھ پہنچنے کا امکان ہے۔

یہ بھی پڑھیں: ملک میں سیلابی صورت حال کے بعد وزیراعظم شہباز شریف کا بڑا فیصلہ سامنے آگیا

دریائے ستلج میں گنڈا سنگھ والا پر انتہائی خطرناک سیلابی صورتحال ہے جہاں پانی کا بہاؤ 2 لاکھ 61 ہزار کیوسک ہے۔ وہاڑی اور بہاولنگر میں بند ٹوٹنے سے کئی علاقے متاثر ہوئے ہیں۔

متاثرہ علاقوں میں امدادی کاموں کے لیے پاک فوج کو بھی طلب کرلیا گیا ہے۔ 669 کشتیاں، 2861 ریسکیو اہلکار اور 9 ہزار سے زائد سول ڈیفنس رضاکار امدادی سرگرمیوں میں شریک ہیں۔ گزشتہ 24 گھنٹوں میں ہزاروں افراد کو محفوظ مقامات پر منتقل کیا گیا جبکہ متاثرہ دیہاتوں سے مویشی بھی نکالے گئے۔ سیلاب متاثرین کے لیے ریلیف کیمپس قائم کیے گئے ہیں جہاں خوراک، علاج اور دیگر سہولیات فراہم کی جارہی ہیں۔