کمالیہ،راوی کی سطح خطرناک حد تک بلند، 26 دیہات میں ہنگامی صورتحال،انخلاء کے احکامات

اسلام آباد (اعتزاز حسن) کمالیہ میں دریائے راوی کی سطح خطرناک حد تک بلند ہو گئی ہے اور انتہائی اونچے درجے کا سیلابی ریلہ علاقے کی طرف بڑھ رہا ہے۔
محکمہ انتظامیہ کے مطابق آئندہ 24 گھنٹوں میں مل فتیانہ کے مقام پر تقریباً دو لاکھ کیوسک تک پانی پہنچنے کا خدشہ ہے۔

فی الحال وہاں سے 45 سے 50 ہزار کیوسک کا ریلہ گزر رہا ہے، لیکن پانی کے بہاؤ اور رفتار میں مسلسل اضافہ جاری ہے جس سے صورتحال  سنگین ہو سکتی ہے۔
سیلابی پانی قریبی دیہات میں داخل ہو چکا ہے جس کے باعث ضلعی انتظامیہ نے ہائی الرٹ جاری کرتے ہوئے 26 دیہات میں ہنگامی صورتحال نافذ کر دی ہے اور لوگوں کو انخلاء کے احکامات دے دیے ہیں۔

یہ خبر بھی پڑھیں :پنجاب میں سیلاب: پاک فوج اور دیگر اداروں کابروقت ریسکیو آپریشن، ہزاروں شہری محفوظ مقامات پر منتقل
مساجد کے ذریعے بار بار اعلانات کیے جا رہے ہیں کہ شہری اپنے اہل خانہ اور مال مویشیوں کے ساتھ فوری طور پر محفوظ مقامات پر منتقل ہو جائیں۔
اسسٹنٹ کمشنر کمالیہ اقر ا ناصر کا کہنا ہے کہ تمام ادارے الرٹ پر ہیں اور متاثرہ علاقوں کو خالی کرانے کے لیے اقدامات تیزی سے جاری ہیں۔