آج سے موسلادھار بارشوں کی پیشگوئی،بالائی علاقوں میں لینڈ سلائیڈنگ کا خطرہ

محکمہ موسمیات نے آئندہ دنوں میں ملک کے کئی شہروں میں گرج چمک کے ساتھ تیز بارشوں کی پیشگوئی کی ہے، جبکہ بالائی علاقوں میں لینڈ سلائیڈنگ کے خدشات بھی ظاہر کیے گئے ہیں۔

آج سے 2 ستمبر تک اسلام آباد اور راولپنڈی میں موسلا دھار بارشیں ہو سکتی ہیں اسی طرح وسطی اور جنوبی پنجاب میں بھی آج سے 31 اگست تک بادل برسنے کا امکان ہے، جن میں ملتان، ڈیرہ غازی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان شامل ہیں۔

پنجاب کے شمالی اور شمال مشرقی اضلاع، جن میں اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین شامل ہیں میں 30 اور 31 اگست کو شدید بارشوں کا امکان ہے۔

یہ خبر بھی پڑھیں :بارشوں کا نیا اسپیل، کہاں کہاں بارش، فلڈ اور لینڈ سلائیڈنگ ہوگی؟ محکمہ موسمیات نے ہائی الرٹ جاری کر دیا
خیبرپختونخوا میں بھی آج سے 31 اگست تک مختلف اضلاع میں بارشیں متوقع ہیں، ملاکنڈ اور ہزارہ ڈویژن میں لینڈ سلائیڈنگ کے خدشات موجود ہیں۔

چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈیرہ اسماعیل خان، ٹانک، کوہاٹ اور بنوں میں بارشیں ہو سکتی ہیں۔آزاد کشمیر کے مختلف اضلاع، بشمول مظفرآباد، باغ، حویلی

کوٹلی، میرپور اور بھمبر میں بھی  دوستمبر تک بارشوں کی پیشگوئی ہے جبکہ گلگت بلتستان میں بارشوں کے ساتھ لینڈ سلائیڈنگ کے خدشے کی وارننگ دی گئی ہے۔

نیشنل ڈیزاسٹر مینجمنٹ اتھارٹی کے مطابق کراچی میں کل سے بارشیں شروع ہونے کا امکان ہے، جن کے باعث شہری علاقوں میں اربن فلڈنگ کا خطرہ بھی موجود ہے۔

یہ خبربھی پڑھیں :پارک ویو سوسائٹی لاہور میں سیلابی ریلا داخل، لوگوں کو گھر خالی کرنے کے لیے احکامات جاری
سندھ کے دیگر اضلاع، مثلاً ٹھٹہ، سجاول، بدین اور تھرپارکر میں 30 اگست سے 2 ستمبر تک بارشوں کا سلسلہ جاری رہ سکتا ہے۔

اسی طرح حیدرآباد، دادو، سکھر، گھوٹکی، لاڑکانہ، جیکب آباد اور کشمور میں بھی 30 اگست سے یکم ستمبر کے درمیان موسلا دھار بارشوں کی پیشگوئی کی گئی ہے۔