فیلڈ مارشل سید عاصم منیر کا پنجاب کے سیلاب متاثرہ علاقوں کا دورہ

فیلڈ مارشل سید عاصم منیر نے پنجاب کے سیلاب متاثرہ علاقوں کا دورہ کیا جن میں سیالکوٹ سیکٹر، شکرگڑھ، نارووال اور کرتارپور شامل ہیں۔
دورے کا مقصد سیلاب کی صورتحال اور جاری ریسکیو و ریلیف کارروائیوں کا جائزہ لینا تھا، فیلڈ مارشل کو موجودہ صورتحال اور آئندہ بارشوں کے لیے تیاریاں کے بارے میں تفصیلی بریفنگ دی گئی۔

انہوں نے متاثرہ علاقوں میں عوام کی مدد کے لیے فوج اور سول انتظامیہ کی مربوط اور انتھک کوششوں کی تعریف کی۔

فیلڈ مارشل نے علاقے کی متاثرہ سکھ کمیونٹی سے بھی ملاقات کی اور کمیونٹی کو یقین دلایا کہ سیلاب کے دوران متاثر ہونے والے تمام مذہبی مقامات، بشمول دربار صاحب کرتارپور  کو ترجیحی بنیادوں پر ان کی اصل حالت میں بحال کیا جائے گا

انہوں نے اس بات پر زور دیا کہ اقلیتوں اور ان کے مذہبی مقامات کا تحفظ ریاست اور اس کے اداروں کی ذمہ داری ہے اور پاکستان کی ریاست اپنی ذمہ داری کو نبھانے میں کوئی کسر نہیں چھوڑے گی۔

سکھ کمیونٹی نے سیالکوٹ سیکٹر کے سیلاب متاثرہ علاقوں میں فیلڈ مارشل کے دورہ کرنے پر شکریہ ادا کیا اور سیلاب کے دوران سول انتظامیہ اور فوج کی خدمات پر  بھی ان  سے اظہار تشکرکیا۔

فیلڈ مارشل نے دربار صاحب کرتارپور کا فضائی جائزہ بھی لیا،سول انتظامیہ کے نمائندوں سے ملاقات کے دوران  فیلڈ مارشل نے ان کی پیشگی کارروائیوں کی تعریف کی، جس سے جان و مال کے نقصان کو کم کرنے میں مدد ملی۔

فوجی جوانوں سے ملاقات کے دوران فیلڈ مارشل سید عاصم منیر  نے ان کے بلند حوصلے، عملی تیاری اور قوم کی خدمت کے عزم کو سراہا۔ انہوں نے مشکل حالات میں ریسکیو اور ریلیف کارروائیوں کے دوران عوام کی مدد کرنے پر فوج کی خدمات کو سراہا،چنیہ آمد پر فیلڈ مارشل سید عاصم منیر کا استقبال کور کمانڈر گوجرانوالہ نے کیا۔