عمر ایوب کے چیمبر کو تالے لگادیے گئے

اسلام آباد: پاکستان تحریک انصاف کے رہنما عمر ایوب کی نااہلی کے بعد قومی اسمبلی میں اپوزیشن لیڈر کے چیمبر کو تالے لگا دیے گئے۔

ذرائع کے مطابق اپوزیشن لیڈر کے چیمبر میں کام کرنے والے تمام ملازمین کے تبادلے بھی کر دیے گئے ہیں۔ مزید بتایا گیا کہ جنید اکبر کے استعفے کے بعد پبلک اکاؤنٹس کمیٹی (پی اے سی) آفس کے ملازمین کا بھی ٹرانسفر ہو گیا ہے۔

واضح رہے کہ جنید اکبر نے پی اے سی کی چیئرمین شپ سے استعفیٰ دے رکھا ہے، جبکہ تحریک انصاف نے پارلیمانی کمیٹیوں اور پبلک اکاؤنٹس کمیٹی سے بھی استعفے دے دیے ہیں۔

ذرائع کا کہنا ہے کہ عمر ایوب کی نااہلی کے بعد نئے اپوزیشن لیڈر کا تقرر کیا جائے گا۔

یہ بھی پڑھیں: مشہور ٹک ٹاکر مخدوم جنید جانی ہنی ٹریپ اسکینڈل میں گرفتار

دوسری جانب تحریک انصاف کے بانی عمران خان نے قومی اسمبلی میں پشتونخوا ملی عوامی پارٹی کے سربراہ محمود خان اچکزئی کو اپوزیشن لیڈر نامزد کر رکھا ہے۔