By سیکیورٹی فورسز نے شمالی وزیرستان میں پولیس چیک پوسٹ پر حملہ ناکام بناتے ہوئے فتنہ الخوارج کے تین دہشت گرد ہلاک کر دیے، جبکہ ایک پولیس اہلکار شہید ہوا۔
اطلاعات کے مطابق خیبرپختونخوا کے ضلع شمالی وزیرستان میں فتنہ الخوارج کے دہشت گردوں نے پولیس چیک پوسٹ پر حملہ کیا جسے فورسز نے بروقت جوابی کارروائی کرکے ناکام بنایا۔ پولیس کی کارروائی میں تین حملہ آور مارے گئے جبکہ ایک اہلکار بہادری سے مقابلہ کرتے ہوئے شہادت کے رتبے پر فائز ہوا۔
وفاقی وزیر داخلہ محسن نقوی نے شمالی وزیرستان میں پولیس چیک پوسٹ پر دہشت گردوں کا حملہ ناکام بنانے پر فورسز کو خراجِ تحسین پیش کیا۔ اپنے بیان میں انہوں نے کہا کہ تین دہشت گردوں کو جہنم واصل کرنا فورسز کی پیشہ وارانہ مہارت کا ثبوت ہے۔
محسن نقوی نے کہا کہ بروقت کارروائی نے خوارجیوں کے مذموم عزائم کو ناکام بنایا۔ انہوں نے جامِ شہادت نوش کرنے والے پولیس اہلکار نظام اللہ کو خراجِ عقیدت پیش کرتے ہوئے کہا کہ انہوں نے دلیری کے ساتھ دہشت گردوں کا مقابلہ کیا۔
وزیر داخلہ نے شہید اہلکار کے خاندان سے ہمدردی اور تعزیت کا اظہار کرتے ہوئے کہا کہ ملک کے بہادر سپوتوں کو سلام ہے جنہوں نے فتنہ الخوارج کے ناپاک عزائم کو خاک میں ملایا۔
