کرس گیل پوڈکاسٹ میں گفتگو کرتے ہوئے رو پڑے، وجہ سامنے آگئی

ویسٹ انڈیز کے اسٹار بلے باز اور ’یونیورس باس‘ کرس گیل نے انکشاف کیا ہے کہ انڈین پریمیئر لیگ (آئی پی ایل) کے دوران بھارت کی ٹیم پنجاب کنگز (سابقہ کنگز الیون پنجاب) نے ان کے ساتھ ایسا رویہ اختیار کیا جس نے انہیں شدید ذہنی دباؤ میں مبتلا کر دیا۔

کرس گیل 2018 سے 2021 تک پنجاب کنگز کا حصہ رہے اور اوپننگ بلے باز کے طور پر کھیلے۔ انہوں نے فرنچائز کے لیے 41 میچوں میں 1,304 رنز بنائے، جن میں ایک سنچری اور 11 نصف سنچریاں شامل تھیں، جبکہ ان کا بہترین اسکور 104 ناٹ آؤٹ رہا۔ تاہم، ان کے مطابق اس ٹیم کے ساتھ ان کی یادیں تلخ ہیں کیونکہ انہیں وہ عزت نہیں دی گئی جس کے وہ مستحق تھے۔

ایک پوڈکاسٹ میں گفتگو کرتے ہوئے کرس گیل نے کہا کہ ان کا آئی پی ایل کیریئر پنجاب کے ساتھ قبل از وقت ختم ہو گیا اور انہیں کنگز الیون میں بے عزتی کا سامنا کرنا پڑا۔ بطور سینئر کھلاڑی، جنہوں نے لیگ کے لیے بہت کچھ کیا، انہیں محسوس ہوا کہ ان کے ساتھ صحیح سلوک نہیں کیا گیا۔ یہ پہلا موقع تھا جب انہیں لگا کہ وہ ڈپریشن میں جا رہے ہیں۔

یہ بھی پڑھیں: ایشیا کپ 2025، دُنیائے کرکٹ کا سب سے بڑا پاک بھارت ٹاکرا، یہ میدان کون جیتے گا؟، تبصرے شروع

گیل نے بتایا کہ ایک موقع پر وہ انیل کمبلے سے بات کرتے ہوئے رونے لگے تھے کیونکہ وہ بہت دکھی اور فرنچائز کے انتظامی معاملات پر مایوس تھے۔

انہوں نے مزید کہا کہ اس دوران ٹیم کے سابق کپتان کے ایل راہول نے انہیں فون کر کے یقین دلایا کہ وہ اگلا میچ کھیلیں گے، لیکن انہوں نے انکار کر دیا۔

کرس گیل نے کہا: “کے ایل راہول نے مجھے فون کر کے کہا، ’کرس! رکو، تم اگلا میچ کھیل رہے ہو۔‘ لیکن میں نے بس کہا، ’میں تمہارے لیے نیک خواہشات ہی کا اظہار کرسکتا ہوں‘ اور اپنا سامان پیک کر کے ٹیم چھوڑ دی۔”