بجلی صارفین کے لئے بڑی خوشخبری، ایک ماہ کا بل معاف، تفصیل جانئے

حکومتی فیصلے کے بعد صارفین کو بجلی بلوں میں ایک ماہ کے ریلیف کی خوشخبری مل گئی ہے۔ وزیراعظم شہباز شریف نے سیلاب سے متاثرہ علاقوں کے عوام کو سہولت دینے کے لیے ایک ماہ کے بجلی بل معاف کرنے کی ہدایت جاری کر دی۔

ذرائع کے مطابق وزیراعظم نے وزارت خزانہ کو ہدایت دی ہے کہ وہ اس مجوزہ ریلیف پر آئی ایم ایف سے رابطہ کرے اور ایک ماہ کے بجلی بلوں کے استثنیٰ سے متعلق بات چیت کرے تاکہ متاثرین کو ریلیف فراہم کیا جا سکے۔ وزارت خزانہ کو اس منصوبے پر آئی ایم ایف سے مشاورت کی ہدایت بھی دی گئی ہے۔

پنجاب گورنر کی تجویز

اس سے قبل گورنر پنجاب سردار سلیم حیدر خان نے وزیراعظم کو خط لکھنے کا اعلان کیا تھا جس میں سیلاب متاثرین کے لیے چھ ماہ کے بجلی بل معاف کرنے کی سفارش کی گئی۔ انہوں نے لاہور کے علاقے مہیلوال کے دورے کے دوران متاثرہ خاندانوں سے ملاقات کی، جہاں شہریوں نے شکایت کی کہ سیلابی ریلوں میں ان کا گھریلو سامان اور جہیز بہہ گیا۔

یہ بھی پڑھیں: عوام کے لیے خوشخبری: بجلی کے فی یونٹ قیمت میں نمایاں کمی

بلاول بھٹو کا مطالبہ

چیئرمین پیپلز پارٹی بلاول بھٹو نے بھی سیلاب متاثرین کے بجلی بل معاف کرنے کا مطالبہ کیا تھا۔ ان کا کہنا تھا کہ سیلاب نے ملک بھر میں بڑے پیمانے پر تباہی مچائی ہے اور سب سے زیادہ نقصان پنجاب میں ہوا ہے۔

انہوں نے کہا کہ سیلاب متاثرین کی بحالی کے تین مراحل ہوتے ہیں: پہلا جان بچانا، دوسرا ریلیف دینا اور تیسرا بحالی کا عمل۔ ان کے مطابق زیادہ تر توجہ ریلیف پر دی جاتی ہے لیکن اصل ضرورت تعمیرِ نو اور ری ہیبلیٹیشن کی ہے۔