وزیرِاعظم شہباز شریف کی نیویارک روانگی، اقوام متحدہ جنرل اسمبلی اجلاس اور صدر ٹرمپ سے ملاقات طے

وزیرِاعظم شہباز شریف آئندہ ہفتے نیویارک میں شروع ہونے والے اقوام متحدہ کی 80ویں جنرل اسمبلی (یو این جے اے) کے اعلیٰ سطح کے اجلاس میں پاکستانی وفد کی قیادت کریں گے۔ دورے کے دوران وزیرِاعظم کی امریکی صدر ڈونلڈ ٹرمپ سمیت عالمی رہنماؤں سے اہم ملاقاتیں بھی متوقع ہیں۔

دفتر خارجہ  کی جانب سے جاری کردہ بیان میں بتایا گیا ہے کہ وزیرِاعظم شہباز شریف اقوام متحدہ اجلاس کے موقع پر امریکی صدر ڈونلڈ ٹرمپ کے ساتھ ہونے والی منتخب مسلم ممالک کے سربراہان کی خصوصی ملاقات میں بھی شرکت کریں گے۔

یہ بھی پڑھیں:مسئلہ کشمیر کے حل کے بغیر بھارت سے کوئی بات نہیں ہوسکتی،شہباز شریف

دفتر خارجہ کے مطابق ’ وزیرِاعظم منتخب اسلامی ممالک کے رہنماؤں کے ساتھ صدر ٹرمپ سے ملاقات میں علاقائی اور عالمی امن و سلامتی کے امور پر تبادلہ خیال کریں گے‘۔

22 ستمبر سے یو این جی اے اجلاس، اہم موضوعات پر خطاب کریں گے

وزیرِاعظم کا دورہ 22 ستمبر 2025 سے شروع ہونے والے یو این جنرل اسمبلی کے اعلیٰ سطح کے اجلاس کا حصہ ہوگا۔ ان کے ہمراہ وزیرِ خارجہ اسحاق ڈار، دیگر وزرا اور اعلیٰ حکام بھی شامل ہوں گے۔

🔊PR No.2️⃣8️⃣0️⃣/2️⃣0️⃣2️⃣5️⃣

Curtain Raiser: Visit of the Prime Minister to New York to Attend the 80th Session of the United Nations General Assembly 22-26 September, 2025 https://t.co/p487uUBro7 pic.twitter.com/uuihQCwlQR

— Ministry of Foreign Affairs – Pakistan (@ForeignOfficePk) September 21, 2025

جنرل اسمبلی سے خطاب میں وزیرِاعظم شہباز شریف مسئلہ کشمیر اور فلسطین پر زور دیتے ہوئے عالمی برادری پر ان دیرینہ تنازعات کے حل کے لیے اقدامات اٹھانے پر زور دیں گے۔

دفتر خارجہ کے مطابق ’وزیرِاعظم مقبوضہ کشمیر اور فلسطین میں حقِ خودارادیت سے انکار اور طویل قبضے کی صورتحال پر عالمی برادری کی توجہ مبذول کروائیں گے‘۔

غزہ بحران، اسلاموفوبیا اور ماحولیاتی تبدیلی اہم نکات ہوں گے

وزیرِاعظم اپنے خطاب میں غزہ میں جاری انسانی بحران پر شدید تشویش کا اظہار کریں گے اور فلسطینی عوام کی مشکلات کے خاتمے کے لیے فیصلہ کن عالمی اقدام کا مطالبہ کریں گے۔

مزید پڑھیں:وزیرِ اعظم محمد شہباز شریف کے مملکت سعودی عرب کے دورے کے حوالے سے مشترکہ اعلامیہ جاری

علاوہ ازیں وہ علاقائی سلامتی، ماحولیاتی تبدیلی، دہشتگردی، اسلاموفوبیا اور پائیدار ترقی جیسے عالمی امور پر بھی پاکستان کا مؤقف پیش کریں گے۔

اقوام متحدہ کی سیکیورٹی کونسل میں سرگرم کردار

دفتر خارجہ کا کہنا ہے کہ وزیرِاعظم شہباز شریف یو این اجلاس کے موقع پر کئی اہم اعلیٰ سطح کی تقریبات میں بھی شرکت کریں گے، جن میں اقوام متحدہ کی سیکیورٹی کونسل کا اجلاس، گلوبل ڈیولپمنٹ انیشی ایٹو اور کلائمیٹ ایکشن پر خصوصی اجلاس شامل ہیں۔

اس کے ساتھ ساتھ، وہ متعدد عالمی رہنماؤں اور اقوام متحدہ کے اعلیٰ حکام سے ملاقاتیں کر کے باہمی دلچسپی کے امور پر تبادلہ خیال کریں گے۔

دفتر خارجہ کے بیان میں کہا گیا ہے کہ ’پاکستان سیکیورٹی کونسل کے موجودہ رکن کی حیثیت سے اقوام متحدہ کے چارٹر کے اصولوں کی پاسداری، تنازعات کی روک تھام، امن کے فروغ اور عالمی خوشحالی کے لیے تمام رکن ممالک کے ساتھ مل کر کام کرنے کے عزم کا اعادہ کرے گا‘۔

کثیرالجہتی نظام کے لیے پاکستان کا پختہ عزم

دفتر خارجہ نے کہا کہ وزیرِاعظم کی یو این جنرل اسمبلی میں شرکت پاکستان کے کثیرالجہتی نظام اور اقوام متحدہ سے وابستگی کو ظاہر کرتی ہے۔ یہ دورہ پاکستان کی عالمی امن، ترقی، اور اقوام متحدہ کے مشترکہ مقاصد کے لیے دیرینہ خدمات کی توثیق بھی ہوگا۔