پاکستان نے سری لنکا کو شکست دے دی

ٹی20 ایشیا کپ کے سپر فور مرحلے کے اہم میچ میں سری لنکا نے پاکستان کو 134 رنز کا ہدف دیا تھا جو پاکستان نے پانچ وکٹوں کے نقصان پر 18 اوورز میں پورا کرکے سری لنکا کے شکست دے دی۔ 

ابوظبی میں کھیلے جارہے میچ میں سری لنکا نے پہلے بیٹنگ کرتے ہوئے مقررہ 20 اوورز میں 8 وکٹوں پر 133 رنز بنائے۔ کامندو مینڈس 50 رنز کے ساتھ نمایاں رہے۔

پاکستان نے ٹاس جیت کر سری لنکا کو بیٹنگ کی دعوت دی، جو اس وقت درست ثابت ہوا جب آدھی ٹیم صرف 58 رنز پر پویلین لوٹ گئی۔ سری لنکا کے پاتھن آسلنکا نے 20، پریرا اور ہاسارنکا نے 15، 15، پاتھن نسنکا نے 8 جبکہ کوشل مینڈس بغیر کھاتہ کھولے آؤٹ ہوئے۔ چمیکا کرونارتنے 17 رنز بنا کر ناٹ آؤٹ رہے۔

گرین شرٹس کی جانب سے شاہین شاہ آفریدی نے 3 وکٹیں حاصل کیں، حارث رؤف اور حسین طلعت نے 2، 2 جبکہ ابرار احمد نے ایک وکٹ لی۔

پاکستان نے بھارت کے خلاف گزشتہ میچ والی ہی ٹیم کو سری لنکا کے خلاف میدان میں اتارنے کا فیصلہ کیا۔ ایونٹ میں دونوں ٹیموں کا یہ پہلا آمنا سامنا ہے، جبکہ دونوں سپر فور مرحلے کے اپنے ابتدائی میچز میں شکست سے دوچار ہوچکی ہیں۔ سری لنکا کو پہلے میچ میں بنگلادیش نے 4 وکٹوں سے ہرایا تھا، جبکہ پاکستان کو بھارت نے 6 وکٹوں سے شکست دی تھی۔

پاکستانی اسکواڈ میں کپتان سلمان علی آغا، فخر زمان، صاحبزادہ فرحان، صائم ایوب، محمد نواز، حسین طلعت، فہیم اشرف، محمد حارث، شاہین آفریدی، حارث رؤف اور ابرار احمد شامل ہیں۔

یہ بھی پڑھیں: ایشیا کپ : فخر زمان کے متنازع آؤٹ پر پاکستان کیجانب سے آئی سی سی کو شکایت درج