پرانی اور استعمال شدہ گاڑی خریدنے کے خواہشمند افراد کے لئے بڑی خبر

فیڈرل بورڈ آف ریونیو (ایف بی آر) نے پرانی اور استعمال شدہ گاڑیوں کی کمرشل بنیادوں پر درآمد پر 40 فیصد ریگولیٹری ڈیوٹی عائد کر دی ہے، جو 30 جون 2026 تک نافذ رہے گی۔ اس حوالے سے نوٹیفکیشن جاری کر دیا گیا ہے۔

نوٹیفکیشن کے مطابق یہ ڈیوٹی کسٹمز ایکٹ 1969 کے تحت PCT ہیڈنگز 8702، 8703، 8704 اور 8711 میں شامل گاڑیوں پر لاگو ہو گی، جو امپورٹ پالیسی آرڈر 2022 کے سلسلہ نمبر 10 کی شق (xvi) کے تحت درآمد کی جائیں گی۔ یہ ریگولیٹری ڈیوٹی پہلے سے نافذ S.R.O. 1152(1)/2025 کے علاوہ عائد کی گئی ہے۔

وزارتِ تجارت نے ایک ایس آر او کے ذریعے پانچ سال تک پرانی گاڑیوں کی کمرشل درآمد کی اجازت دی تھی، جس پر یہ 40 فیصد اضافی ڈیوٹی فوری طور پر نافذ العمل ہے۔ یہ فیصلہ اقتصادی رابطہ کمیٹی (ای سی سی) کے 18 ستمبر 2025 کے اجلاس میں کیا گیا، جس کی صدارت وزیر خزانہ و ریونیو سینیٹر محمد اورنگزیب نے کی۔ بعد ازاں کابینہ نے بھی اس فیصلے کی توثیق کر دی۔

وزارتِ تجارت کی جانب سے 30 ستمبر 2025 کو جاری کردہ SRO 1895(1)/2025 میں امپورٹ پالیسی آرڈر 2022 میں ترمیم کرتے ہوئے نئی شق شامل کی گئی، جس کے تحت مذکورہ ہیڈنگز میں آنے والی پانچ سال سے کم عمر گاڑیوں کی کمرشل درآمد 30 جون 2026 تک ممکن ہو گی۔ اس کے بعد گاڑیوں کی عمر کی حد ختم کرنے کی تجویز بھی زیر غور ہے۔

یہ بھی پڑھیں: جائیدادوں کی کم مالیت ظاہر کرنیوالوں کیخلاف ایف بی آر نے شکنجہ تیار کرلیا

حکومتی فیصلے کے مطابق درآمد شدہ گاڑیاں ماحولیات، حفاظتی اور معیار کے تقاضوں کے مطابق ہوں گی اور ان کی ٹیسٹنگ و سرٹیفیکیشن انجینئرنگ ڈیولپمنٹ بورڈ (ای ڈی بی)، وزارت صنعت و پیداوار کی ہدایات کے مطابق کی جائے گی۔

مزید یہ کہ 40 فیصد ریگولیٹری ڈیوٹی 30 جون 2026 تک برقرار رہے گی، جس کے بعد یہ ڈیوٹی ہر سال 10 فیصد کم کی جائے گی اور مالی سال 2030 تک مکمل طور پر ختم ہو جائے گی، جیسا کہ ٹیرف پالیسی بورڈ نے تجویز کیا ہے۔