پورٹ قاسم دنیا کی نویں تیزی سے ترقی کرنے والی کنٹینر بندرگاہ قرار

بین الاقوامی ادارے کی جاری کردہ کنٹینر پورٹ پرفارمنس انڈیکس (CPPI 2024) میں پورٹ قاسم کو دنیا کی نویں سب سے زیادہ ترقی کرنے والی کنٹینر بندرگاہ قرار دیا گیا ہے۔

اس انڈیکس میں 400 سے زائد عالمی بندرگاہوں کا تجزیہ کیا گیا جس سے پاکستان کی عالمی اہمیت اجاگر ہوئی۔ رپورٹ کے مطابق گزشتہ چار برسوں میں پورٹ قاسم نے 35.2 پوائنٹس کی غیر معمولی ترقی کی جو عملی کارکردگی کا ثبوت ہے۔

وفاقی وزیر جنید انور چوہدری نے اس کامیابی کو “قومی فخر کا لمحہ” قرار دیتے ہوئے کہا کہ اس میں پالیسی اصلاحات اور مؤثر قوانین نے کلیدی کردار ادا کیا ہے۔ انہوں نے کہا کہ ڈیجیٹلائزیشن، کارگو آٹومیشن اور ریئل ٹائم ٹریکنگ نے بندرگاہوں کی کارکردگی کو نئے معیار سے ہمکنار کیا ہے جبکہ ڈی پی ورلڈ کے قاسم انٹرنیشنل کنٹینر ٹرمینل (QICT) نے عالمی معیار برقرار رکھنے میں اہم کردار ادا کیا۔

وفاقی وزیر نے مزید بتایا کہ حکومت نے طویل عرصے سے رکے ہوئے ڈریجنگ منصوبے کی منظوری دے دی ہے جس سے بڑے جہازوں کی آمدورفت ممکن ہو سکے گی اور تجارتی حجم میں اضافہ ہوگا۔ انہوں نے کہا کہ نئے برتھس اور اسٹوریج سہولیات برآمدی صلاحیت کو نمایاں طور پر بڑھائیں گی۔

یہ بھی پڑھیں: پاکستان اسٹاک ایکسچینج نےکاروبارشروع ہوتے ہی نئی تاریخ رقم کردی

چیئرمین پورٹ قاسم ریئر ایڈمرل (ر) معظم الیاس نے اس کامیابی کو افرادی قوت کی محنت کا نتیجہ قرار دیا۔ ان کا کہنا تھا کہ جدید ٹیکنالوجی اور اختراع نے پورٹ آپریشنز کو عالمی معیار میں شامل کر دیا ہے اور یہ کامیابی پاکستان کو خطے کے ایک مستحکم لاجسٹکس حب کے طور پر تسلیم کراتی ہے۔

انہوں نے مزید کہا کہ کراچی، گوادر اور پورٹ قاسم مل کر ایک جدید سمندری مثلث تشکیل دے رہے ہیں، جس سے بہتر کارکردگی کے ذریعے درآمدات اور برآمدات کی لاگت میں کمی واقع ہوگی۔ چیئرمین نے کہا کہ عالمی سطح پر یہ کامیابی مزید غیر ملکی سرمایہ کاری کو بھی متوجہ کرے گی، جبکہ پورٹ قاسم کی ترقی پاکستان کی بحری خوشحالی کے وژن کی عملی تعبیر ہے۔