آئی ایم ایم اے ایف ورلڈ چیمپئن شپ میں پاکستانی فائٹرز چھا گئے

 پاکستانی فائٹرز نے آئی ایم ایم اے ایف ورلڈ چیمپئن شپ 2025 میں شاندار کارکردگی دکھا کر دنیا بھر میں ملک کا نام روشن کر دیا۔

پاکستانی فائٹرز نے بہترین پرفارمنس دکھاتے ہوئے کئی عالمی چیمپئنز کو شکست دی، لائٹ ویٹ کیٹیگری میں شہاب علی نے یوکرین، زیمبیا اور تاجکستان کے چیمپئن فائٹرز کو شکست دی ، شہاب علی کو فائٹر آف دی ٹورنامنٹ کا نام دیا گیا۔

اسٹراؤ ویٹ کیٹگری میں عبدالمنان نے زیمبیا کے فائٹر اور موجودہ عالمی چیمپئن علی یور سوونبردیئف کو شکست دی، فیدر ویٹ میں ایان حسین نے بلغاریہ کے قادرجان عیسیٰ کو دھول چٹا دی۔

پاکستانی پروفیشنل فائٹر اسماعیل خان نےآذربائیجان کے حریف کو پہلے ہی راؤنڈ میں ناک آؤٹ کر کے کامیابی اپنے نام کی ۔

یہ بھی پڑھیں : ایشین کپ فٹ بال کوالیفائر، پاکستان کا افغانستان سے میچ مشکلات سے دوچار

پاکستان مکسڈ مارشل آرٹس فیڈریشن کے صدر عمر احمد کو آئی ایم ایم اے ایف ایشیا بورڈ میں ساؤتھ ایشیا کا ڈائریکٹر مقرر کیا گیا۔

صدر مکسڈ مارشل آرٹس فیڈریشن عمر احمد نے کہا کہ یہ فیڈریشن کی صلاحیت کا ثبوت ہے کہ وہ عالمی سطح کے شوقیہ فائٹرز کو پروفیشنل کیریئر تک لے جا رہی ہے، عالمی سطح پر پاکستان اب مکسڈ مارشل آرٹس کی دنیا میں ایک ابھرتی طاقت کے طور پر تسلیم کیا جا رہا ہے ، حکومتِ پاکستان کی جانب سے کسی قسم کی براہِ راست مالی امداد فراہم نہیں کی گئی۔

واضح رہے کہ جارجیا میں ہونے والے ایونٹ میں 72 ممالک کے 800 سے زائد فائٹرز نے حصہ لیا جس میں 10 رکنی ٹیم نے پاکستان کی نمائندگی کی۔