چینی کی قیمتوں سے متعلق مقدمہ، شوگر ملز کو سپریم کورٹ سے بڑا ریلیف مل گیا

سپریم کورٹ نے چینی کی مسابقتی قیمتوں کے معاملے میں شوگر ملز کو بڑا ریلیف دیتے ہوئے چیئرپرسن کمپیٹیشن کمیشن آف پاکستان کے دوبارہ سماعت کے اختیار سے متعلق فیصلہ کالعدم قرار دے دیا ہے۔

سپریم کورٹ آف پاکستان نے بدھ کو کیس کو دوبارہ کمپیٹیشن اپیلیٹ ٹریبونل کو بھیجنے کا حکم دیا۔ اس کیس کی سماعت جسٹس شکیل احمد اور جسٹس عامر فاروق پر مشتمل بینچ نے کی، جبکہ فیصلہ جسٹس شکیل احمد نے تحریر کیا، جو کہ 9 صفحات پر مشتمل ہے۔

یہ بھی پڑھیں:چینی کی قیمتوں میں کمی متوقع، تفصیلات جانئے

عدالتی فیصلے میں کہا گیا کہ آئین کے آرٹیکل 10-A کے تحت ہر شہری کو منصفانہ ٹرائل کا حق حاصل ہے۔ اگر چیئرپرسن پہلے ہی ایک رائے دے چکی ہو تو فیصلہ کن ووٹ  دینا غیر جانبداری کے اصولوں کے خلاف ہے۔ عدالت نے واضح کیا کہ کاسٹنگ ووٹ کا اختیار صرف انتظامی فیصلوں تک محدود ہے، عدالتی کارروائیوں میں اس کا اطلاق نہیں کیا جا سکتا۔

فیصلے میں کہا گیا کہ ‘انصاف نہ صرف ہونا چاہیے بلکہ ہوتا ہوا نظر بھی آنا چاہیے’۔ واضح رہے کہ 2021 میں کمپیٹیشن کمیشن آف پاکستان (سی سی پی) نے چینی کی قیمتوں میں اضافے پر ملک بھر کی شوگر ملز کے خلاف کارروائی کی تھی۔

مزید پڑھیں:ملک بھر میں چینی کی نئی قیمت مقرر، نوٹیفکیشن جاری

عدالت نے 4 رکنی کمیشن میں سے 2 ارکان نے شوگر ملز پر جرمانہ عائد کرنے جبکہ 2 نے دوبارہ تحقیقات کی سفارش کی تھی۔ اس تعطل کے بعد چیئرپرسن نے فیصلہ کن ووٹ استعمال کرتے ہوئے شوگر ملز پر جرمانے عائد کیے تھے۔

شوگر ملز نے اس فیصلے کو کمپیٹیشن اپیلیٹ ٹریبونل میں چیلنج کیا، جہاں چیئرپرسن کے کاسٹنگ ووٹ کو کالعدم قرار دے کر کیس دوبارہ ’سی سی پی‘ کو بھیج دیا۔ ٹریبونل کے فیصلے کے خلاف شوگر ملز نے سپریم کورٹ سے رجوع کیا تھا، جہاں اب ان کے حق میں فیصلہ سنایا گیا ہے۔