سرکاری سکولوں میں ٹیچر انٹرنزکی ہزاروں بھرتیاں کرنے کا فیصلہ

پنجاب بھر کے سرکاری سکولوں میں اساتذہ کی کمی کو پورا کرنے کے لیے محکمۂ تعلیم نے مزید ٹیچر انٹرنز بھرتی کرنے کا فیصلہ کیا ہے12 ہزار 500 ایس ٹی آئیزکی بھرتی کا اشتہار آئندہ ہفتے جاری کیا جائے گا۔

اس سے قبل تعلیمی اداروں میں خدمات انجام دینے والے انٹرنز کے معاہدوں میں آٹھ ماہ کی توسیع کی گئی تھی محکمہ سکول ایجوکیشن پنجاب مستقبل میں مستقل بنیادوں پر اساتذہ بھرتی کرنے کے بجائے ٹیچر انٹرنز کے ایک مستقل پول کے قیام پر غور کر رہا ہے۔

اس پالیسی کے تحت جب بھی سکولوں میں تدریسی عملے کی کمی ہوگی تو ضرورت کے مطابق انٹرنز کو تعینات کیا جائے گا۔

مزید 12 ہزار 500 بھرتیوں کے بعد انٹرنز کی مجموعی تعداد 25 ہزار تک پہنچ جائے گی ان انٹرنز کو ماہانہ بنیاد پر معاوضہ ادا کیا جائے گا۔

یہ خبر بھی پڑھیں :پنجاب، 10ہزار سکول آؤٹ سورس، مختلف سیکیلز کے 44ہزار ٹیچرز کی آسامیاں ختم کرنیکا فیصلہ

پنجاب کے وزیر تعلیم رانا سکندر حیات نے کہا ہے کہ انٹرنز کو سبجیکٹ اسپیشلسٹ کی بنیاد پرسکولوں میں تعینات کیا جائے گا۔

انہوں نے مزید بتایا کہ ٹیچنگ لائسنس سسٹم کے آغاز کے بعد جو انٹرنز مطلوبہ ٹیسٹ پاس کریں گے ان کی مستقل تقرری پر بھی غور کیا جائے گا۔

ساتھ ہی سی ایس ایس امتحان کے خواہشمند امیدواروں کے لیے بھی خوشخبری ہے کہ 364 نئی اسامیوں کا اعلان کیا گیا ہے۔

یہ نیا نظام صوبے میں تدریسی معیار بہتر بنانے اور بھرتیوں کے عمل کو مؤثر بنانے کی کوشش کا حصہ ہے۔