سرکاری ملازمین کے لیے بڑی خوشخبری: الاونس میں بڑا اضافہ

وفاقی حکومت نے سرکاری ملازمین کے لیے ہاؤس رینٹ الاونس میں 85 فیصد اضافہ کرنے کا فیصلہ کیا ہے۔ وزارتِ خزانہ نے اس اضافے کی باضابطہ منظوری دے دی ہے اور اب یہ سمری وفاقی کابینہ کے اجلاس میں حتمی منظوری کے لیے پیش کی جائے گی۔

یہ اضافہ گریڈ 1 سے گریڈ 22 تک کے تمام سرکاری ملازمین پر لاگو ہوگا، جس سے جونیئر اور سینئر افسران دونوں مستفید ہوں گے۔ اس سہولت کا اطلاق مستقل اور کنٹریکٹ (عارضی) دونوں اقسام کے ملازمین پر ہوگا، جس کے تحت وفاقی ملازمین کی ایک بڑی تعداد اس سے فائدہ اٹھا سکے گی۔

وزارتِ خزانہ کے حکام کے مطابق نیا ہاؤس رینٹ الاونس موجودہ بنیادی تنخواہ (بیسک سیلری) کی بنیاد پر دیا جائے گا، جبکہ اس سے قبل یہ 2008 کے پے اسکیل کے مطابق فراہم کیا جا رہا تھا۔

یہ بھی پڑھیں: سرکاری ملازمین کو یکم نومبر سے قبل ایڈوانس تنخواہ اور پنشن ادا کرنے کے احکامات جاری

یہ امر قابلِ ذکر ہے کہ کئی برسوں سے سرکاری ملازمین کو 2008 کے پے اسکیل کے تحت الاونس دیا جا رہا تھا، جو بڑھتی ہوئی مہنگائی اور کرایوں کی موجودہ صورتحال کی عکاسی نہیں کرتا تھا۔ ذرائع کا کہنا ہے کہ نئے فارمولے کے اطلاق سے ملازمین کی تنخواہوں میں نمایاں اضافہ متوقع ہے، خاص طور پر نچلے گریڈ کے ملازمین کے لیے جو بلند کرایوں سے سب سے زیادہ متاثر ہو رہے تھے۔