ملک بھر میں امتحانات منسوخ

اعلیٰ تعلیمی کمیشن (ایچ ای سی) کے ایجوکیشن ٹیسٹنگ کونسل (ای ٹی سی) نے اعلان کیا ہے کہ 11 اور 12 اکتوبر کو ہونے والے متعدد تحریری امتحانات ملتوی کر دیے گئے ہیں۔

ایک سرکاری بیان کے مطابق جن امتحانات کو ملتوی کیا گیا ہے اُن میں انڈرگریجویٹ اسٹڈیز ایڈمیشن ٹیسٹ (USAT)، ہائر ایجوکیشن اپٹیٹیوڈ ٹیسٹ (HAT) اور AML-CFT اسامیوں کے لیے ریکروٹمنٹ ٹیسٹ شامل ہیں۔

ایچ ای سی کے مطابق یہ فیصلہ ملک کے مختلف حصوں میں موجودہ امن و امان کی صورتحال کے پیش نظر کیا گیا ہے۔ ادارے نے مزید کہا کہ ملتوی شدہ امتحانات کا نیا شیڈول بعد میں جاری کیا جائے گا اور تمام رجسٹرڈ امیدواروں کو اس حوالے سے مطلع کر دیا جائے گا۔

دوسری جانب وزارت داخلہ و انسداد منشیات کے ایک نوٹیفکیشن کے مطابق اسلام آباد اور راولپنڈی میں موبائل انٹرنیٹ سروسز (3G/4G) تاحکمِ ثانی معطل رہیں گی۔ وزارت نے پاکستان ٹیلی کمیونیکیشن اتھارٹی (پی ٹی اے) کو ہدایت کی ہے کہ وہ اسلام آباد اور راولپنڈی کے کمشنرز اور پولیس حکام کے ساتھ مل کر ضروری اقدامات کرے۔

یہ بھی پڑھیں: شوگر ملز ایسوسی ایشن نےچینی کی قیمت میں تشویش ناک حد تک اضافے کا خدشہ ظاہر کر دیا

امن و امان کی صورتحال کے باعث عوامی ٹرانسپورٹ بھی متاثر ہوئی ہے، میٹرو بس سروس معطل رہی جبکہ مری روڈ کے اطراف میں واقع کاروبار اور ہوٹلز کو عارضی طور پر بند کرنے کے احکامات بھی جاری کیے گئے ہیں۔