صارفین کے لیے اچھی خبر، مرغی سبزی سے بھی سستی ہو گئی

مہنگائی کے ستائے صارفین کے لیے خوشخبری ہے کہ برائلر گوشت کی قیمت میں نمایاں کمی کا سلسلہ جاری ہے، جس کے باعث اب برائلر گوشت کئی سبزیوں سے بھی سستا ہو چکا ہے۔

تازہ ترین اعداد و شمار کے مطابق برائلر گوشت کی فی کلو قیمت میں 8 روپے کی کمی ہوئی ہے، جس کے بعد پرچون مارکیٹ میں اس کی قیمت 395 روپے فی کلوگرام ہو گئی ہے۔

یہ بھی پڑھیں:مرغی کی قیمت میں بڑی کمی،فی کلو کتنے کا ہوگیا؟

مارکیٹ ذرائع کا کہنا ہے کہ حالیہ ہفتوں میں طلب میں کمی، سپلائی میں بہتری اور موسمی اثرات کے باعث برائلر گوشت کی قیمتوں میں مسلسل گراوٹ دیکھنے میں آ رہی ہے۔ زندہ برائلر کی قیمت میں بھی 5 روپے فی کلو کی کمی ریکارڈ کی گئی ہے، جس کے بعد زندہ فارم ریٹ 245 روپے، تھوک ریٹ 259 روپے اور پرچون ریٹ 273 روپے فی کلو مقرر کیا گیا ہے۔

اس کے برعکس صافی برائلر گوشت، یعنی صفائی شدہ اور تیار گوشت، بعض علاقوں میں اب بھی 480 روپے فی کلو کے حساب سے فروخت ہو رہا ہے، تاہم عمومی مارکیٹ میں دستیاب گوشت کی قیمت اب عام سبزیوں جیسے شملہ مرچ، بھنڈی اور مٹر سے بھی کم ہو چکی ہے، جو عام طور پر 400 سے 500 روپے فی کلو تک فروخت ہو رہی ہیں۔

دوسری جانب فارمی انڈوں کی قیمت میں معمولی اضافہ دیکھا گیا ہے۔ رپورٹ کے مطابق فی درجن انڈے کی قیمت میں 1 روپے کا اضافہ ہوا ہے، جس کے بعد نئی قیمت 326 روپے فی درجن مقرر کی گئی ہے۔ انڈوں کی پیٹی، جس میں 30 درجن انڈے ہوتے ہیں، اب مارکیٹ میں 9,660 روپے میں فروخت ہو رہی ہے۔

مزید پڑھیں:مرغی کے گوشت کی قیمت کو پر لگ گئے، عوام کی پہنچ سے باہر

تجزیہ کاروں کا کہنا ہے کہ برائلر گوشت کی قیمتوں میں کمی صارفین کیلئے وقتی ریلیف ہے، تاہم اگر فیڈ، ٹرانسپورٹ یا دیگر پیداواری اخراجات میں اضافہ ہوا تو قیمتیں دوبارہ اوپر جا سکتی ہیں۔

صارفین نے برائلر گوشت کی قیمتوں میں کمی کو خوش آئند قرار دیتے ہوئے حکومت سے مطالبہ کیا ہے کہ دیگر بنیادی اشیائے خورونوش کی قیمتوں میں بھی کمی کیلئے مؤثر اقدامات کیے جائیں۔