سربراہ پاک فضائیہ ظہیر احمد بابر سدھو کا دورۂ رومانیہ، دوطرفہ دفاعی تعاون کے فروغ پر اتفاق

سربراہ پاک فضائیہ ایئر چیف مارشل ظہیر احمد بابر سدھو نے رومانیہ کا سرکاری دورہ کیا جہاں انہوں نے سیکرٹری دفاع رومانیہ ایڈورڈ باچائڈے اور چیف آف ڈیفنس جنرل گیورگیتسا ولاد سے اعلیٰ سطح پر ملاقاتیں کیں۔ ان ملاقاتوں میں دونوں ممالک کے مابین عسکری تعاون کو مزید فروغ دینے اور دفاعی تعلقات کو مستحکم کرنے پر اتفاق کیا گیا۔

یہ بھی پڑھیں:چیف آف ایئر اسٹاف ظہیر احمد بابر سدھوکا دورۂ رومانیہ، اہم دفاعی شعبوں میں تعاون پر تبادلہ خیال

ملاقات کے دوران دونوں ممالک کی عسکری قیادت نے خطے میں امن و سلامتی کے لیے باہمی ہم آہنگی اور مضبوط سفارتی و دفاعی تعلقات کی اہمیت پر زور دیا۔ ایئر چیف مارشل ظہیر احمد بابر سدھو نے اس عزم کا اظہار کیا کہ پاکستان، رومانیہ کے ساتھ اپنے دوستانہ اور بڑھتے تعلقات کو قدر کی نگاہ سے دیکھتا ہے جو علاقائی امن و استحکام کے فروغ میں کلیدی کردار ادا کر رہے ہیں۔

سربراہ پاک فضائیہ نے مشترکہ چیلنجز سے نمٹنے کے لیے دوطرفہ تعاون، تربیتی شراکت داری اور آپریشنل ہم آہنگی کو مزید بڑھانے کی ضرورت پر بھی زور دیا۔

رومانیہ کے سیکرٹری دفاع ایڈورڈ باچائڈے نے پاک فضائیہ کی شاندار عسکری کارکردگی اور پیشہ ورانہ صلاحیتوں کو سراہتے ہوئے کہا کہ رومانیہ، پاک فضائیہ کے وسیع تجربے سے استفادہ حاصل کرنے میں گہری دلچسپی رکھتا ہے۔ اسی طرح، رومانیہ کے چیف آف ڈیفنس جنرل گیورگیتسا ولاد نے دونوں ممالک کی فضائی افواج کے مابین طویل المدتی تزویراتی تعلقات کے فروغ کے لیے مشترکہ مشقوں اور تربیتی پروگرامز کے انعقاد کی خواہش ظاہر کی۔

مزید پڑھیں:’یومِ فضائیہ‘،’پاک ائیر فورس جدید جنگ کے لیے خلا اور سائبر صلاحیتوں سے لیس ہو رہی ہے، ائیر چیف مارشل ظہیر احمد بابر سدھو

سربراہ پاک فضائیہ کا یہ دورہ دونوں ممالک کے مابین دفاعی شراکت داری کو نئی سمت دینے کی جانب ایک اہم پیش رفت قرار دیا جا رہا ہے، جو اس بات کا ثبوت ہے کہ پاکستان اور رومانیہ بدلتے ہوئے سیکیورٹی چیلنجز کے تناظر میں قریبی تعاون اور مضبوط تعلقات کے تسلسل کے لیے پرعزم ہیں۔