بے روزگار نوجوانوں کے لئے بڑی خوشخبری، حکومت کا بڑا اقدام

دنیا بھر کی طرح پاکستان میں بھی آن لائن روزگار کے رجحان میں تیزی سے اضافہ ہو رہا ہے، اور اس سلسلے میں آن لائن ملازمت کے متلاشی نوجوانوں کے لیے بڑی خوشخبری سامنے آئی ہے۔

سندھ حکومت نے صوبے کے نوجوانوں کے لیے ’’سندھ جاب پورٹل‘‘ قائم کر دیا ہے، جس کے ذریعے آن لائن روزگار کے مواقع حاصل کیے جا سکیں گے۔

کراچی میں سندھ جاب پورٹل کی افتتاحی تقریب وزیراعلیٰ سندھ مراد علی شاہ نے انجام دی۔ اس موقع پر اپنے خطاب میں وزیراعلیٰ کا کہنا تھا کہ صوبائی حکومت ہر شعبے میں ڈیجیٹلائزیشن کی طرف بڑھ رہی ہے، اور سندھ جاب پورٹل اس سلسلے کا سب سے اہم قدم ہے۔ انہوں نے کہا کہ یہ پورٹل خاص طور پر اُن باصلاحیت نوجوانوں کے لیے تیار کیا گیا ہے جو آن لائن روزگار کے متلاشی ہیں۔ یہ نظام انہیں میرٹ پر روزگار فراہم کرنے میں مدد دے گا اور تمام کارروائی آن لائن مکمل ہوگی۔

مراد علی شاہ نے بتایا کہ سندھ جاب پورٹل کی ٹیسٹنگ کے لیے انسٹی ٹیوٹ آف بزنس ایڈمنسٹریشن (آئی بی اے) کو منتخب کیا گیا ہے۔ وزیراعلیٰ نے کہا کہ جو امیدوار پہلی بار ٹیسٹ دے گا، اس کے اخراجات سندھ حکومت برداشت کرے گی۔ تاہم اگر کوئی امیدوار ناکام ہوتا ہے تو اسے دوبارہ ٹیسٹ دینے کی اجازت ہوگی۔ انہوں نے مزید کہا کہ حکومت ہر ماہ ٹیسٹنگ کروائے گی تاکہ ناکام امیدواروں کو زیادہ انتظار نہ کرنا پڑے۔

وزیراعلیٰ سندھ نے جاب پورٹل کے طریقہ کار کی وضاحت کرتے ہوئے کہا کہ پورٹل پر موجود کسی بھی ملازمت پر کلک کرنے سے متعلقہ شخص کو ایک پیغام موصول ہوگا، اور جیسے ہی عمل مکمل ہوگا، امیدوار کو انٹرویو لیٹر ارسال کر دیا جائے گا۔

یہ بھی پڑھیں: متحدہ عرب امارات میں دُنیا کے سب سے بڑے منصوبے کا آغاز، روزگار کے ہزاروں مواقعے پیدا

انہوں نے ٹیسٹ کے طریقہ کار کے حوالے سے بتایا کہ اگر امتحان 100 نمبروں پر مشتمل ہو تو اس میں 50 نمبر ٹیسٹ کے ہوں گے۔ جو امیدوار ٹیسٹ میں 80 فیصد نمبر حاصل کرے گا، اسے 50 میں سے 40 نمبر ملیں گے جبکہ انٹرویو کے لیے 30 نمبر مختص کیے گئے ہیں۔

وزیراعلیٰ مراد علی شاہ نے امید ظاہر کی کہ ’’سندھ جاب پورٹل‘‘ صوبے کے نوجوانوں کے لیے روزگار کے نئے دروازے کھولے گا اور صوبے میں شفاف، میرٹ پر مبنی بھرتی کے نظام کو فروغ دے گا۔