نئے پاسپورٹ سے متعلق فراڈ، حکومت نے شہریوں کو خبردار کر دیا

ڈائریکٹوریٹ جنرل آف امیگریشن اینڈ پاسپورٹس (ڈی جی آئی پی) نے عوام کو ایک نئے آن لائن فراڈ سے خبردار کر دیا ہے۔ ادارے کے مطابق ایک جعلساز نے گوگل میپس پر دفتر کے اصل مقام کے ساتھ جعلی ذاتی رابطہ معلومات، بشمول فون نمبر اور ای میل ایڈریس، درج کر رکھی ہیں۔ اس شخص کی جانب سے جاز کیش اور بینک اکاؤنٹس کے ذریعے رقم وصول کرنے کے جھوٹے دعوے کیے جا رہے ہیں۔

ڈی جی آئی پی نے واضح کیا ہے کہ کسی بھی شخص یا ادارے کو پاسپورٹ آفس کی جانب سے ذاتی ذرائع یا غیر سرکاری چینلز کے ذریعے ادائیگیاں وصول کرنے کی اجازت نہیں ہے۔ عوام کو ہدایت کی گئی ہے کہ وہ ایسے کسی بھی فرد سے رابطہ نہ کریں جو خود کو پاسپورٹ آفس کا نمائندہ ظاہر کرے۔

ادارے کے عہدیداروں نے شہریوں سے اپیل کی ہے کہ وہ مکمل طور پر محتاط رہیں، اپنی ذاتی معلومات کسی کے ساتھ شیئر نہ کریں اور کسی غیر مجاز فرد کو کسی بھی قسم کی ادائیگی سے گریز کریں۔ ڈی جی آئی پی نے اپنی ایڈوائزری میں واضح طور پر کہا ہے: “خبردار رہیں! اپنی ذاتی معلومات شیئر نہ کریں اور کسی غیر متعلقہ شخص کو ادائیگی نہ کریں۔”

یہ بھی پڑھیں: نادرا سے’’وراثتی سرٹیفکیٹ‘‘ کیسے حاصل کیا جاسکتا ہے؟ طریقہ کار سامنے آگیا

شہریوں کو ہدایت کی گئی ہے کہ کسی بھی قسم کی سرکاری رہنمائی یا معلومات کے حصول کے لیے ڈائریکٹوریٹ جنرل آف امیگریشن اینڈ پاسپورٹس کی سرکاری ہیلپ لائن 051111344777 پر رابطہ کریں۔

محکمے نے عوام کے تعاون پر شکریہ ادا کرتے ہوئے کہا کہ شہریوں کو دھوکہ دہی سے بچانے کے لیے ادارہ مکمل طور پر سرگرم ہے اور عوامی آگاہی کو مزید فروغ دینے کے لیے اقدامات جاری ہیں۔ مزید مصدقہ معلومات کے لیے شہریوں کو ڈی جی آئی پی کی سرکاری ویب سائٹ www.dgip.gov.pk یا آفیشل سوشل میڈیا اکاؤنٹ @dgipofficial پر رجوع کرنے کی ہدایت کی گئی ہے۔