میٹرک و انٹرمیڈیٹ کے امتحانات کب ہونگے؟ تاریخ سامنے آگئی

پنجاب ایجوکیشن ڈیپارٹمنٹ نے تعلیمی سال 2026 کے لیے میٹرک، انٹرمیڈیٹ اور مڈل سطح کے امتحانات کا تفصیلی شیڈول جاری کر دیا ہے۔

اس اعلان کے ساتھ ہی محکمہ تعلیم نے نئے تعلیمی سال کے آغاز، داخلہ پالیسی، نصابی تبدیلیوں اور اسکول کیلنڈر کی اپ ڈیٹ سے متعلق اہم فیصلوں سے بھی آگاہ کیا ہے۔ حکام کے مطابق یہ تمام اقدامات تعلیمی نظام کو مزید منظم اور مؤثر بنانے کے لیے کیے گئے ہیں تاکہ طلبہ کو بروقت سہولیات فراہم کی جا سکیں اور امتحانی شیڈول پہلے سے واضح ہو۔

محکمہ تعلیم کے مطابق میٹرک کے سالانہ امتحانات 3 مارچ 2026 سے شروع ہوں گے۔ صوبے بھر کے تمام بورڈز اسی تاریخ کو دسویں اور نویں جماعت کے امتحانات کا آغاز کریں گے۔ اس کے علاوہ انٹرمیڈیٹ یعنی گیارہویں اور بارہویں جماعت کے امتحانات 5 مئی 2026 سے شروع کیے جائیں گے، جس کے لیے متعلقہ تعلیمی بورڈز پہلے مرحلے میں رول نمبر سلپس اور شیڈول جاری کریں گے۔

نئے تعلیمی سال کے حوالے سے محکمہ تعلیم نے اسکولوں کی داخلہ پالیسی میں بھی چند اہم تبدیلیاں متعارف کرائی ہیں تاکہ داخلہ کے عمل کو آسان، شفاف اور مؤثر بنایا جا سکے۔ اسی سلسلے میں سرکاری اسکولوں کا سالانہ کیلنڈر بھی اپ ڈیٹ کیا گیا ہے جبکہ نصاب میں کچھ ترمیمات کی اجازت دی گئی ہے۔ ان تمام تبدیلیوں کا مقصد طلبہ کے تعلیمی معیار اور انہیں فراہم کی جانے والی سہولیات کو بہتر بنانا ہے۔

یہ بھی پڑھیں: پاکستان شاہینز کی ناقابلِ شکست کارکردگی، ٹائٹل کی جیت، صدر، وزیراعظم سمیت قومی اسٹارکرکٹرز نے تعریفوں کے پل باندھ دیے

سرکاری اعلان کے مطابق نیا تعلیمی سیشن 1 اپریل 2026 سے باضابطہ طور پر شروع ہو گا۔ اس کے ساتھ ہی سرکاری اسکولوں میں مفت درسی کتب کی تقسیم کا عمل 5 اپریل 2026 سے شروع کر دیا جائے گا، تاکہ طلبہ سیشن کے آغاز پر ہی اپنی کتابیں حاصل کر سکیں۔

مزید برآں، آٹھویں جماعت کے امتحانات کی تاریخ بھی جاری کر دی گئی ہے۔ محکمہ تعلیم کے مطابق آٹھویں جماعت کے سالانہ امتحانات 3 فروری 2026 کو منعقد ہوں گے۔ امتحانی شیڈول کے قبل از وقت اعلان کا مقصد طلبہ اور اساتذہ کو تیاری کے لیے مناسب وقت فراہم کرنا ہے، تاکہ نئے تعلیمی سال کی شروعات مزید منظم طریقے سے ہو سکے۔